CPPO, CCPO directors gipatawag sa Senado
CEBU, Philippines - Miatubang sa nagpadayon nga hearing sa Senado kabahin sa extra judicial killings kagahapong adlawa ang direktor sa kapulisan sa Cebu City Police Office ug Cebu Provincial Police Office.
Si Sr. Supt. Joel Doria sa CCPO, samtang si Sr. Supt. Eric Noble sab alang sa CPPO. Si Doria nga nahinabi sa telepono sa mga tigbalita miingon nga ilang hatagan og saktong impormasyon ang mga senador sa mga kaso sa pagpamatay sa mga drug personalities sa dakbayan sa Sugbo.
Sa listahan sa CCPO, 18 ka mga tawo ang napatay sa police operations apan adunay 42 ang gipatay nga gidudahang nalambigit sa illegal drugs nga binuhatan sa mga wala mailhing kriminal ug padayon pa nilang giimbestigar, kini ilang gitawag og “deaths under investigation”(DUI).
Ang tulo niini nasulbad na ug nasuta nga kagrupo ra sa biktima sa negosyo sa illegal drugs ang responsable kay gusto silang pahilumon.
Miabot na og 121 ang napatay sa kapolisan sa Central Visayas sa anti-drug operations ug 172 ang DUI. Miabot 1,299 mga drug users ug 1530 ang mga drug pushers ang nadakpan. (BANAT NEWS)
- Latest
