Margot: Tubaga sa korte

CEBU, Philippines - Niawhag si Konsehal Margarita “Margot” Osmeña sa pito ka opisyal sa siyudad nga sa korte na lang tubagon ang kaso nga ilang giatubang may labot sa mga sakyanan sa City Hall nga wala nila giuli niadtong acting mayor pa siya. Ang mga opisyal mao sila si Konsehal Joel Garganera dihang kapitan pa kini sa Tinago, Philip Zafra sa Tisa, Ramil Ayuman sa Apas, Yolandito Cagang sa Basak-Pardo, Lemar Alcover sa Sambag 1, Ana Tabal sa Tagba-o ug Rosalita Callino sa Buot-Taop.

Sila si Garganera, Ayuman ug Zafra nikwestiyon sa wala na pag-uli kanila sa mga sakyanan human giimbentaryo sa City Hall. Apan matud ni Osmeña nga nganong mokwestiyon pa ang mga opisyal nga dili man ila ang maong mga sakyanan nga gitugyan ngadto kanila.

Si Ayuman nagduda nga gipaspasan ang ilang kaso human iyang gipasakaan og kaso si Mayor Tomas Osmeña ug Konsehal Osmeña sa Office of the President may labot sa pag-abli og balik sa kontrobersiyal nga Inayawan landfill.

Apan alang kang Konsehal Osmeña nga kung gipaspasan pa nila, nganong karon pa nilusot ang warrant of arrest nga Hunyo pa nasang-at ang kaso.

Sila si Ayuman, Tabal ug Garganera ang nalutsan og warrant of arrest.

Si Bise Mayor Edgardo Labella nikwestiyon sa pagpagawas og warrant of arrest tungod kay nakita niini nga ang pag-isyu og warrant dili pa haum sa kaso. “Sa ato pa, kung aresto mayor under the revised rules of summary procedure and Republic Act 6036 nag-ingon diha nga the accused shall not be arrested except when they do not appear if required by the court to appear, so dili gyud moto propio nga mo-issue unta og warrant of arrest gani kanang maong position nato pinasubay na sa balaud ug pinasubay sad na sa jurisprudence,” pasabot ni Labella.

Hinuon gitugyan na ni Labella sa mga abogado sa mga nahisgutan ang maong kaso. (BANAT NEWS)