Mga tunghaan gilimpyuhan, 11 patay sa dengue
CEBU, Philippines - Naalarma na ang kadagkuan sa Cebu City Hall ug Department of Education kay niabot na og 11 ka tinun-an sa mga public schools sa dakbayan ang namatay tungod sa dengue.
Laing 844 ang natakboyan sab og dengue virus gikan niadtong Hunyo hangtud Oktubre 18.
Tungod niini, gihimo kagahapon ang dungan nga pagpanglimpyo sa tanang public schools sa dakbayan base sa kamanduan ni Konsehal Joy Augustus Young ug DepEd City Superintendent Bianito Dagatan.
Matud ni Young nga giawhag dayon niya si Dagatan nga mohimo’g dinaliang lakang aron kapugngan pa ang padayong pagkuyanap sa dengue virus ngadto sa mga tinun-an.
Nakompirmar sa mga kawani sa DepEd ug City Health Department nga aduna gyuy mga tunghaan nga may mga dapit nga puy-anan sa lamok ug segurado sila nga diha magka-dengue ang mga tinun-an.
Ang mga tunghaan nga adunay namatay sa dengue mao ang Barangay Luz High School, (1); Barangay Luz Elementary School, (3); Talamban Elementary School, (1); Lahug Elementary School, (1); Busay Elementary School, (1); San Nicolas Elementary School, (1); Pung-ol Sibugay Integrated School, (1); Kalunasan Elementary School, (1); ug Labangon Elementary School, (1).
Matud ni Young nga sa Taptap Elementary School, 10 ka tinun-an ang nagka-dengue ug upat kanila ang anaa pa sa ospital. Si Dagatan niingon nga paninguhaon nila nga hawanan ang tunghaan aron sa pagbalik sa klase liwas sa Adlaw sa mga Kalag, wala nay mga lamok.
Base sa statistics nga sagad sa mga tinun-an nga nagka-dengue mao ang mga babaye tungod kay daghan kanila dili magsul-ob og taas nga medyas ug dali ra paakon sa mga lamok ang bitiis. (BANAT NEWS)
- Latest
