LTFRB ang sad-an
Ngiob ang palibot ug nagtutaligsik ang palibot. Segun sa PAGASA tungod ni sa pagbalik na sa Habagat sa Kabisay-an nga gisamotan sa low pressure area duol sa Surigao del Sur. Kinahanglan ra ba ming manglakaw sa akong asawa.
Napu ka gutlo ibabaw sa nasudnong highway ang among pinuy-anan. Kon mag-taxi, may tulo mi ka kapilian: Pagpanawag sa landline sa taxi nga kasagaran mobalibad nga way taxi sa duol; pagpamalihug og drayber sa habal-habal pagpara ug pag-giya sa taxi padung sa amo; ug paglugsong aron pagpangunay og atang og taxi sa highway.
***
Mao nga, ug ato-ato ra ni, naghunahuna gihapon ko nga mosuway og gamit sa apps sa akong telepono sa Uber o Grab. Bisan sa subli-subli nga pasidaan sa kadagkoan sa LTFRB nga kolorum ang kasagaran sa mga sakyanan nga gipakatap sa Uber ug Grab.
Wa kong kahibawo, ug way planong magsusi, may pagtugot ba sa LTFRB ang among makuhang sakyanan. Wa kong kahibawo, ug way planong mangutana, may insurance bang matsambahan nga sakyanan. Hiktin rang among panginahanglan: Makaabot sa among padulngan sa tukmang panahon sa labing sayon nga paagi.
***
Sa nangaging mga semana akong napanid-an nga di na balibaran matag book nako og Uber. Lahi sa nangaging mga buwan nga sige lang "no cars available." Nagpasabot bang mas daghan nang sakop sa Uber tungod sa mas luag nilang mga lagda sa pagpanawat?
Apan karong nangisog nang LTFRB, mangahas pa kaha og pamasahero ang Uber ug Grab? Human sa pagluwat og ultimatum nga dakpon nang tanang kolorum nilang mga sakyanan sugod karong Miyerkules, Hulyo 26, mapugos ba sa pagpanghipos?
***
Samtang nagsuwat ko ini, gi-ablihan nako ang akong apps sa Uber ug GrabCar. Niingon ang Uber nga P201 ang plitehan paingon sa among destinasyon. Samtang ang GrabCar nipahibawo nga P273 ang plitehan (mas gamay na kay sa binuang nila sa una nga patongan og P400 kon bukid ang padulngan).
Makalapas ba mi sa balaod sa pag-risgo nga kolorum ang masakyan? Mas maayong pangutana: Kon epektibo pang napatuman sa LTFRB ang mga lagda sa hapsay, luwas ug makiangayon nga publikong transportasyon, mangita pa kahang mga pasahero og alternatibo sa mga sakyanan nga ilang gisininaan og prangkisa?
- Latest
