Bulawanong lemonsito

CEBU, Philippines - Ang lemonsito maoy usa sa nabantog na gyud nga citrus fruit nga makahatag og ka-aslom sa atong mga sud-an o mao kini kanunay nato nga isagol sa atong mga sawsawan nga patis ug suka.

Aduna kini giusa nga katigayunan sa lime ug lemon. Mao kini ang gitawag nga reunion sa duha ka klase sa prutas.

Sama sa ubang prutas, ang lemonsito napuno kini sa powerful antioxidant nga mao ang vitamin C. Mao kini ang motabang sa pagmintinar sa maanindot nga kurba sa panglawas, moalima sa mga body tissues, kabukugan ug panit.

Apan dili lang kana ang mahimo sa lemonsito gumikan kay adunay pipila ka mga natala ang http://www.healthydietbase.com kun unsa pa ang mga benepisyo nga maangkon sa lemonsito ang praktikal nga pagamit niini.

Matag buntag sayo ug wala pa’y sulod ang tiyan, moinum og kinutaw nga tubig nga adunay duga sa lemonsito, puti nga asukar tungod kay:

Makapalimpyo kini sa body system ilabi na ang imong tiyan, kidneys ug atay.

• Makalikay sa sakit nga osteoarthritis ug diabetes.

• Makapahayag sa kolor sa ihi.

• Makapakunhod sa blood cholesterol

• Makapaayo kini sa gahi nga ubo.

• Makatabang kini sa mga nakasinati og hangover.

Mas maayo usab kini nga gamiton isip mouthwash tungod kay:

• Makapalikay kini sa pagkadaot sa ngipon

• Dili na makasinati og pagdugo sa lagos.

• Makalikay sa pagkapangag.

Mas maayo kini nga pangnudnud sa panit ug ubang parte sa lawas:

• Kon ikaw adunay problema sa imong ilok, mas maayo nga nudnuran kini nimo og lemonsito aron moputi ug mawala ang baho niini.

• Mamahimo usab nimo nudnuran ang mga itom nga bahin sa imong lawas ilabi na ang siko ug tuhod.

• Hinay-hinay niini nga tangtangon ang imong mga tumtum kon nudnuran lang usab kini nimo.

• Makapawala kini sa kaspa.

Hinumdumi nga ang lemonsito, dili kini makapawagtang sa sakit apan makapasaka kini sa resistensiya sa imong lawas. Mao nga sugdan nato ang healthy lifestyle aron mas maayo ang atong pagpakabuhi matag adlaw.