Paglumos sa katawhan
Sa makausa pa, napahinumdoman ang mga Sugbuanon nga dili pa andam ang Sugbo alang sa kusog nga bunok sa uwan, nga bisan sa mga pasalig sa pagpalambo sa drainage system, dali ra gihapong moawas ang mga kanal ug mga suba nga mosangpot dayon sa pagbaha sa kadalanan ug bisan sa kabalayan sa ubos nga mga bahin sa Metro Cebu.
Kun itandi sa nangaging katuigan, mahimong namenosan ang kalawom ug kalapad sa baha sa pipila ka dapit nga gibutangan og mas dagkong mga imburnal apan wa pa gyud hingpit nga masulbad ang problema.
* * *
Wa sab magsilbi ang bag-ong taktika batok sa baha nga gipatuman sa Department of Public Works and Highways (DPWH) ug sa lokal nga mga opisyal: Ang pagsumpay sa mga kanal ngadto sa labing duol nga mga sapa aron kamenosan ang kahigayonan sa pag-awas.
Kay gawas nga may mga negosyante ug pamilya nga nagdumili sa pagpaagi sa mga kanal sa pribado nilang mga luna, mahimong tungod sa karaang kahadlok sa demalas o sa lunlon nga kahakog, ang mga sapa mismo ang mas unang niawas kay nabuni sa mga basura ug ilegal nga mga estruktura.
* * *
Wa katabang ang pasalig sa Philippine Atmospheric, Geophysical and Astronomical Services Administration (PAGASA) nga hapit na ang ting-init kay nikagiw na ang Amihan ug nabanos na ang init nga hangin gikan sa Pasipiko.
Kay hangtod karon wa pa gyud makat-on ang katawhan ug ang lokal nga mga opisyal sa dugay na nga pagtulon-an sa kinaiyahan nga ang ting-init maoy labing tukma nga higayon sa pagpangandam, dili sa pagpangiyugpos ug pagtinanga, alang sa tinguwan.
* * *
Nagpabiling wa’y klaro ang mga kanal. Wa pa malimpiyo ang mga suba. Wa pa mahawan ang kabalayan ug labi na ang dagkong buildings nga nagyaka sa daplin ug sa taliwa gyud sa mga sapa. Wa pa matarong ang paghipos sa mga basura. Makugang pa ba ta sa kalit nga pagbaha?
Sa pikas nga bahin, nagpadayon ang pag-init sa kalibotan tungod sa pagkapuo sa kakahoyan ug nagkagrabeng polusyon, nga nakapadako sa kadagatan, nga mahimong molumos sa labing ubos nga mga isla ug kanasuran sa mosunod nga katuigan. Unya na ba kita magpakabana kun uwahi nang tanan?
* * *
- Latest
