Barok hapit ma-deputy bosyo

CEBU, Philippines - Girekomendar sa mga priso sa Cebu Provincial Detention and Rehabilitaion Center (CPDRC) nga himoon nilang deputy bosyo ang high profile drug personality nga si Alvaro “Barok” Alvaro apan wala kini dawata sa namunuan sa maong pasilidad.

Niadtong miaging Huwebes, nangayo si CPDRC officer-in-charge Bobby Legaspi sa listahan sa mga girekomendar sa inmates kun kinsa ang ihulip kang outgoing bosyo Lito Granada kinsa ibalhin na ngadto sa Bilibid.

Dihanga gisumiter ang lista, matud ni Legaspi, ang gusto sa mga priso nga himoong bosyo mao si Beinvenido “June” Noel Jr. ug ang deputy bosyo mao si Barok. Wala niya kini dawata ug mihangyo og laing rekomendasyon kay dili mahimong irekomendar ang high profile inmate sama ni Barok.

Nasayran nga ang modesisyon kun kinsa ang himoong Mayor de mayores mao ang nagdumala sa pasilidad.

Matud ni Legaspi nga ang ilang gusto nga mahimong lider, mao kadtong “low key” nga makatabang kanila ug sa mga priso. Ang bosyo maoy magsilbing tigpamaba o tulay sa mga priso ingon man sa management sa CPDRC. 

Si Granada nagkanayon nga kinahanglan ang bosyo kahibalo modumala sa mga priso ug masiguro ang kalinaw sulod sa prisohan. (BANAT NEWS)