MPTDC motabang sa Long Life Project ni Osmeña

CEBU, Philippines - Dunay maayong resulta ang nahitabong luncheon meeting tali nila ni Cebu City Mayor Tomas Osmeña ug sa Chairman sa Metro Pacific Tollways Development Corporation (MPTDC) Manny V. Pangilinan niadtong adlaw’ng Huwebes sa wala pa gisugdan ang ground breaking ceremony sa Cebu-Cordova Link Expressway.

Matud ni Osmeña ang presidente sa MPTDC Joey Lim mipasalig kanila nga motabang kini sa siyudad sa mga tambal alang sa Long Life project sa dakbayan. Giingong mas makamenus sa presyo ang siyudad sa palitong mga tambal nga ipangapod-apod niadtong mga kabus nga nagkinahanglan niini.

“So he said they buy, they consolidated their medicines purchases, and they buy hundred of millions of pesos worth of medicines its much cheaper so I told him sakay na lang mi. He said, sure para maka-save gyud atong siyudad that’s the most exciting thing that I know  that something will definitely happen, maka-save gyud ta,” sigon pa sa mayor.

Ang siyudad mitagana og kwarta alang na sa pagpalit og mga tambal tungod kay matod pa ang mga supplier sa siyudad giingong dili mo-bid sa ubos nga kantidad.

Ang siyudad mogasto og P20 milyones kada tuig alang sa tambal sa 24,000 ka mga masakiton ug gusto niya himuong 40,000 ang makadawat og inadlaw-adlaw nga tambal.

Gipasabot hinuon sa mayor nga moagi pa kini og taas nga proseso sanglit kinahanglan una tun-an sa duha ka habig ang mga internal procedures sa usa’g-usa.

Mokonsulta pa usab ang siyudad sa Commission on Audit (COA) ug sa konseho kun mahimo ba kini nilang buhaton. (BANAT NEWS)