Monday Squad Basketball Season 2 sugdan na karon
CEBU, Philippines - Ang pipila ka mga beteranong commercial players ug kanhi collegiate stars magtige na sab sud sa hardcourt pinaagi sa Monday Squad Basketball Club (MSBC) Season 2 nga mosikad karong adlawa diha sa Casal’s Village gym sa Barangay Mabolo, dakbayan sa Sugbo.
Miabot ngadto sa walo ka teams ang mag-ilog sa kampiyonato ning torneyo nga gipaluyohan sa San Remigio Beach Club ni businessman-sportsman Mark Anthony Ynoc, kanhi varsity sa Sacred Heart School-Ateneo de Cebu Magis Eagles.
Si Ynoc mao sab ang team captain sa Hard Court Kings diin siya moduwa uban ni UV Basketball team manager Samsam Gullas ug Jeff Codera, ang Sugbuanong skills trainer nga sakop sa Golden State Warriors training camp sa NBA ug ingon man lisensiyadong Gold coach sa USA Basketball ubos sa Youth Development Program niini.
Gipangulohan sa defending champion IPI-Silogan Ni Gian, lain pang ikabangga sa Hard Court Kings mao ang Aspa, MJ-Z Collections 101, In This Corner, SG-ARQ Builders, Tribu ug Warriors.
Magkumbati sila ubos sa single round robin format sa eliminasyon diin ang top 2 teams makaangkon og awto-matik nga luna sa semifinals. Ang no. 3 batok no. 6 ug no. 4 batok no. 5 mag-abot sa playoffs, samtang tagak na ang no. 7 ug no. 8. Ang crossover semis magsubay og do-or-die format. Ang mga mananaog magsangka dayon sa knockout finals.
Gawas ni Ynoc, ang mga nag-organisar sa maong liga mao sila si James Cabilino, Ivan de los Santos, Ian Gantuangco, Dominador Lesadio ug Jake Monton. (BANAT NEWS)
- Latest
