Lalaki nilikida sa SUV
MANILA, Philippines - Sa loob ng isang nakaparadang sports utility vehicle natagpuang patay ang isang 46-anyos na lalaki kamakalawa sa Valenzuela City.
Ang biktima na kinilala sa pamamagitan ng kanyang driver’s license card ay si Guiller Fernando Brinas, 46, ng No. 37 Abangan Sur, Marilao, Bulacan.
Sa ulat ng Valenzuela City Police, dakong alas-11:52 ng tanghali nang makarinig ng magkasunod na putok ng baril ang security guard na si Rodolfo Cipriano sa harapan ng binabantayang garahe ng Pamana Bus Company sa may MH Del Pilar, Brgy. Malanday, ng naturang lungsod.
Kanyang natukoy na nagmula ang mga putok sa nakaparadang itim na Mitsubishi Adventure (XNM 462) kaya’t tumawag ito sa Police Community Precint 6 na rumesponde sa lugar at nadiskubre ang bangkay ni Brinas na nagtamo ng tama ng bala sa ulo at braso.
Inaalam ng pulisya kung may CCTV sa lugar upang makilala ang suspek.
- Latest