Binaliay sa Cebu Coliseum
CEBU, Philippines - Magsangka na sa makasaysayanong mixed martial arts event sa Sugbo ang elite fighters sa ikaduhang edisyon sa Cebu Extreme Fight League nga giulohan og “No Way Out” karong gabii diha sa Cebu Coliseum.
Si Yaw-Yan ArDigma CEO/Founder and Vis-Min director Master Benigno ‘Ekin’ R. Caniga Jr. nagkanayon nga mas eksplosibo ug kulbahinam ang aksiyon nga masaksihan sa mga Cebuano fight fans tungod kay masukod ang katakus sa mga fighters sud sa ‘steel cage’ nga mao karon ang gigamit sa mga dagkung MMA organizations sa kalibotan sama sa UFC ug ONE FC.
“When we say MMA, the first thing that will come out of our minds is the cage. Honestly, mahal ang pagpahimo og cage but with the rise of MMA, I felt that we really need to have one here in Cebu,” matud pa ni Master Ekin.
“Mausab gyud ang duwa sa mga fighters. Basta naa na sila sud sa cage, wala na’y daganay sakto gyud nga “No Way Out,” dugang pa ni Master Ekin.
Sa main event sa maong professional-amateur MMA fight card, si Roel ‘Akiyama’ Rosauro sa Yaw-Yan ArDigma Cebu moharong ni Urtych ‘Tank’ Alarin sa XFC MMA sa Butuan.
Gusto ni Rosauro nga mohimo og ‘knockout’ nga kadaugan, apan wala siya mosaad kun kanus-a niya pakamangon si Alarin.
“Walay bakus para sa modaog, pero motivated kaayo ko kay nagdala ko sa bandera sa Cebu. Dili ko gusto mauwawan atubangan sa mga Cebuanos,” matud pa sa 28-anyos nga si Rosauro.
Sa supporting main event, ang grappler nga si Arnel ‘Project X’ Ylanan sa DEFTAC Vagabond Cebu makiglayog ni Rommel Lugo sa Yaw-Yan Olongapo.
Sa laing sangka, ang kanhi sakop sa Philippine Muay Thai team nga si Niño Rio ‘Pitbull’ Saoy sa Mactan Combat Sports makigsukmag-patid ni Ivan Victorio sa Yaw-Yan Olongapo.
Magsangka sa undercards mao sila si Dane Dawal batok Frederick Lim Jr., Rufino ‘Noypi’ Mante batok Romel Deita, Peter ‘Sniper’ Sonido batok ‘Mighty’ Kim Vallejos, Mark ‘Fit’ Tapales batok Luther ‘Bang’ Trigo’, Lemuel ‘Musang’ Maglinte batok Rodel ‘Mighty Mouse’ Calbog ug Rhyle ‘Bully’ Lugo batok Ariane ‘X-Cutter’ Fantilanan. (BANAT NEWS)
- Latest