Vargas kumpiyansang makukuha ang POC presidency
MANILA, Philippines - Ilang oras matapos ang deadline ay pormal na isinumite ni Association of Boxing Alliances of the Philippines head Ricky Vargas ang kanyang certificate of candidacy para sa presidential seat ng Philippine Olympic Committee sa opisina ng POC sa Philsports Complex sa Pasig.
Umaasa si Vargas na makakakuha ng malaking suporta mula sa mayorya ng 40 National Sports Associations (NSAs) ang magluluklok ng mga opisyales sa POC, kasama na ang presidente, sa eleksyon sa Nobyembre 25.
“Hopefully, as we get closer to November 25 we could prove that we could make this big step not for us but for them (NSAs at mga atleta),” wika ni Vargas.
Tatapatan ng 64-anyos na si Vargas ang 82-anyos na si incumbent president Jose ‘Peping’ Cojuangco, Jr.
Simula nang maihalal bilang pangulo ng POC noong 2004 ay hindi pa natatalo si Cojuangco.
Ang huling pagkakataon na may humamon kay Cojuangco ay noong 2008 kung saan niya tinalo si Art Macapagal, 21-19, ng shooting association.
Ang iba pang posisyong paglalabanan ay ang chairman, first vice president, second vice president, treasurer at auditor, habang ang secretary-general ay iniluluklok ng POC president.
Ang listahan ng mga kandidato ay sasaliksikin naman ng POC Commission of Elections na binubuo nina Abono party list Rep. Conrado Estrella, dating International Olympic Committee representative to the Philippines Frank Elizalde at Bernie Oca ng La Salle.
Nakasabay ni Vargas, ang kanang kamay ni businessman/sportman Manny V. Pangilinan at TNT Katropa board of governor sa PBA, sa pagsusumite ng kanilang certificate of candidacy para tumakbo sa kani-kanilang mga posisyon ay sina Tagaytay Rep. Bambol Tolentino ng cycling (chairman), Rep. Albee Benitez ng badminton (1st vice president), retired Gen. Lucas Managuelod ng muay thai (2nd vice president), Samahang Basketbol ng Pilipinas (SBP) executive director Sonny Barrios (treasurer) at Ting Ledesma ng table tennis (auditor).
Nasa tiket naman ni Cojuangco sina Tom Carrasco ng triathlon (chairman), Joey Romasanta ng volleyball (1st vice president), Jeff Tamayo ng soft tennis (2nd vice president), Julian Camacho ng wushu (treasurer) at Jonne Go ng canoe kayak (auditor).
- Latest