Nakapabor sa sukmagay gitigbas

CEBU, Philippines - Natabas ang ulo sa usa ka drayber sa traysikad human gitigbas sa igsuon sa iyang gikasukmagay sa Sitio Rama, Dumlog, Dakbayan sa Talisay niadtong Huwebes sa hapon. Ang biktima nailhan lang nga si Ben kinsa walay klarong pinuy-anan samtang ang suspek mao si Rodel Villahermosa, 36, minyo nga nagpuyo sa Barangay Biasong sa nahisgutang siyudad.

Si PO1 Othelo Victor Largo sa Talisay City Police Station niingon nga si Ben ug ang igsuon sa suspek nga usa sab ka drayber sa traysikad ang nagsinukmagay.

Apan si Villahermosa nga nakadungog nga alkanse ang iyang igsuon sa sinukmagay nangita sa biktima.

Samtang nagmaneho sa iyang traysikad ang biktima gitigbas kini sa suspek gamit ang sundang ug diha gyud gitumong sa ulo ug agtang.

 Gidala sa Talisay City Hospital ang biktima ug gibalhin sa tambalanan sa Siyudad sa Sugbo.

 Nitahan ra sab sa iyang kaugalingon ang suspek ngadto sa mga barangay tanod sa Dumlog dala ang sundang nga iyang gigamit sa pagtigbas ug gi-turnover ngadto sa kapolisan. Gikatakdang pasakaan og kaso ang suspek. (BANAT NEWS)