4 motor giharos sa truck sa SRP

CEBU, Philippines - Giharos sa truck ang upat ka mga motorsiklo nga nakaparada sa may South Road Properties sa Dumlog, Dakbayan sa Talisay kagahapon sa udto.

Ang drayber sa truck nga si Luis Sarabia Jr., hingkod, ang dali nga gidala sa Talisay City Hospital human siya nakaangkon og mga samad ug bun-og sa kalawasan. Si PO2 Marvin Papellero sa Talisay City Traffic Division nibutyag nga gikan nag-deliver og mga manok ang truck ug paingon na kini sa Siyudad sa Sugbo.

Apan pag-abot sa nahisgutang lugar nawagtangan og kontrol sa manobela ang drayber hinungdan nga nisaka sa gutter ang truck ug niharos sa mga motorsiklo nga nag-parking. Ang mga motor gipanag-iya sa mga trabahante sa Al Ammar Automotive. Naguba sab ang koral sa maong kompaniya. Si Leo Kintanar, supervisor ni Sarabia, niingon nga manok sa Sr. Pedro ang ilang gihatud niadtong tungura hinuon siya nipasalig nga ilang asikasuhon ang ilang drayber ug ang danyos nga nahimo sa disgrasya. (BANAT NEWS)