Batas trapiko, ituturo sa mga estudyante
MANILA, Philippines - Target ng Land Transportation Office (LTO) ang mga paaralan sa high school sa bansa partikular sa Metro Manila para mabigyang kaalaman at sanayin sa mga batas trapiko.
Ito ay makaraang pormal na ilunsad kahapon ng LTO sa pangunguna ni LTO Chief Virginia Torres ang “Kick-Off Yes! Move Campus Caravan” na pinasimulan sa Ramon Magsaysay High School sa Cubao, Quezon City.
Ayon kay Torres layunin ng hakbang ng LTO na maimulat ang mga kabataang mag-aaral sa mga kaganapan sa lansangan kung saan marami na ang nasasawi dahil sa hindi pagsunod sa batas trapiko gaya ng hindi paggamit ng tamang tawiran, foot bridges at iba pa.
Sinabi ni Torres na kung bata pa lamang ay maimumulat na ang kaisipan sa mga malagim na aksidente sa lansangan dahil sa hindi pagsunod sa batas trapiko, tataglayin nila ito sa paglaki.
Binigyang diin ni Torres na mahalagang maisama sa pagtuturo sa mga mag-aaral ang tungkol sa batas trapiko dahil bukod sa dagdag kaalaman, ito rin ay magagamit nila sa pagkuha ng drivers license at hindi na sila mahihirapan sa mga katanungan sa mga eksaminasyon.
- Latest
- Trending