Cargo plane 'bumagsak' sa NAIA
MANILA, Philippines - Wasak ang propellers ng isang twin-engine beachcraft cargo plane makaraang bumagsak ang gulong nito ilang segundo lamang matapos na mag-landing sa Ninoy Aquino International Airport Terminal 1 kahapon ng umaga.
Sa tinanggap na report ng Manila International Airport Authority (MIAA), dakong alas-10:07 ng umaga nang mag-collapse ang nose wheel ng Baron cargo plane na may Registry number RP-C317 nang mag-touch-down o makapalag sa runway 06 ng paliparan.
Dahil dito, halos mawalan ng kontrol ang piloto na si Capt. Emmanuel Lara subalit hindi nasaktan kasama ang nag-iisang pasahero nito nang mabilis na makalabas sa naturang eroplano.
Ang nasabing eroplano ay may kargang mga isda na nagmula pa sa Roxas, Palawan na hindi naman nasira dahil sa nakapaloob sa oxygen-filled plastic containers bagaman malakas na naalog sa matinding impak. (Ellen Fernando)
- Latest
- Trending