Krusyal nga duwa sa Road Warriors
CEBU, Philippines - Mahinungdanon nga daog maoy tuyo sa NLEX Road Warriors aron mahayagan pa ilang kahigayonan sa playoffs sa PBA Commissioner’s Cup.
Ang NLEX ni multi-titled coach Yeng Guiao makigharong sa TNT KaTropa karong alas-4:15 sa hapon didto sa Mall of Asia Arena.
Ang Road Warriors nangiwit sa standing sa ilang 0-4 nga baraha ug kun mapilde sila karon batok sa KaTropa mosamot kalagom ang ilang kahigayonan sa playoffs.
Saligan gihapon ni Guiao ang iyang kanhi best import nga si Wayne Chism, bisan pa og pakyas kini paghatag og daog sa Warriors. Si Chism mihimo hinuon og 33 puntos ug 19 ka rebounds sa ilang kapildihan batok sa Star Hotshots.
Sa main game sa alas-7 sa gabii, ang San Miguel Beermen tuyo nga mosakmit sa ikaduha nilang sunod-sunod nga daog batok sa Phoenix Fuel Masters. (BANAT NEWS)
- Latest