National Open Invitational Athletics Championships: National tracksters mapapasabak

MANILA, Philippines - Susubukan ng mga atleta mula sa probinsiya na labanan ang malalakas na mga miyembro ng national team sa pagbubukas ngayon ng 2017 Ayala-National Open Invitational Athletics Championships sa Ilagan City Sports Complex ng Ilagan, Isabela.

Mahigit isang libong atleta kabilang na ang mula sa bansang Sri Lanka, South Korea, Malaysia, Singapore, Taiwan, Hong Kong, Guam, Brunei at Iraq ang lalahok sa taunang kumpetisyon na mayroong kabuuang 78 gold medals ang nakataya sa loob ng apat na araw.

Sabi ni Philippine Athletics Track and Field Association (PATAFA) president Philip Ella Juico, gagamitin nila ang kumpetisyon para sa pagbuo ng mga miyembro ng national team na sasabak sa 29th Southeast Asian Games ngayong Agosto 19 hanggang 31 sa Kuala Lumpur, Malaysia.

Ayon pa kay Juico, mawawalan ng slots sa national team ang hindi sasali sa naturang kumpetisyon kaya namimilegro ang Filipino-Americans na sina Kayla Richardson at Caleb Stuart na hindi kasama sa listahan dahil hindi sila dumating para sa sumali sa nasabing kompetisyon.

Si Richardson ay gold medalist sa 100-m dash habang si Stuart gold winner din sa hammer throw ng 2015 Sea Games sa Singapore.

“This is obligatory to all members of the national team to participate in this competition because we don’t rely on submitted records. We want to see them in actual competition for the benefit of Patafa and for our stakeholders,” sabi ni Juico.

Pinaalalahanan ni Juico ang mga miyembro ng national team dahil tumatanggap sila ng monthly honorarium mula sa Philippine Sports Commission kaya may pananagutan din sila sa gobyerno.

“They are recieving allowances from the PSC. That’s why we want to make sure the money is well spent by knowing how they are performing,” dagdag ni Juico.

Ang ibang Fil-Ams kagaya ni Rio Olympian Eric Cray na isa ring gold medalist  sa 100-m at 400-m hurdles sa Singapore Sea Games ay dumating para sumali sa kompetisyon, gayundin sina Christopher Uboc sa 3,000 steeplechase, Fil-Canadian Zion Corrales-Nelson at Mark Harry Diones.

Inaasahan ding dodominahin nina Rio Olympian long jumper Marestella Torres-Sunang, Jesson Ramil Cid, Mervin Guarte, Edgardo Alejan Jr., Archand Christian Bagsit at Janry Ubas ang kanilang event sa National open.