Tumulak ug Abella magpasakop na sa BOPK

CEBU, Philippines - Nakahukom na sila si Konsehal Dave Tumulak ug Nendell Hanz Abella nga magpasakop na sila sa Bando Osmeña Pundok Kauswagan (BOPK) human sila gihagit sa Team Rama nga magpaila kun unsay ilang bulok-politika.

Nagpasabot kini nga mayoriya na ang BOPK diha sa konseho sa dakbayan ug kun magpahigayon na og election alang sa mga modumala sa mga komitiba sa City Council, ang mga konsehal na sa BOPK maoy sagad mahimong tsirman.

Pagka karon, siyam na ang mga konsehal sa BOPK ug pito ka konsehal ang alyado sa Team Rama, ug ikawalo si Vice Mayor Edgardo Labella nga maoy presiding officer sa City Council.

Matud ni Tumulak nga nahukman na gyud niya nga magpasakop sa BOPK kay mas gihatagan og pagtagad sa grupo ang pagpalambo sa siyudad ug managsama usab sila og baruganan ni Mayor Tomas Osmeña, ilabi na ang pagmentinar sa Public Order Safety, itandi sa Team Rama nga iyang gihulagway mas nagtutok sa kontrobersiya nga dili makahatag og kaayuhan sa siyudad.

Dunay sugyot si Tumulak sa iyang kaubanan sa konseho nga ipadaplin ang pamolika ug magtinabangay sila sa pagpalambo sa siyudad ug hatagan og higayon si Mayor Osmeña nga mapatuman ang gusto niyang himoon.

Si Abella usab nagkanayon nga nalipay kaayo siya tungod kay si Osmeña nga pangulo sa BOPK mihatag gyud kanila og higayon nga madumala ang tahas pagdumala sa mga gimbuhaton nga dili manghilabot kun unsay ilang isugyot nga mga plano.

Gitudlo ni Osmeña nga deputy mayor for peace and order si Tumulak, samtang si Abella gitudlo usab nga deputy mayor for education. Matud ni Osmeña nga dugay ra niya nga gidawat sila si Tumulak ug Abella nga kauban sa BOPK.

Kaniadtong Sabado, pormal usab nga miipon sa BOPK si Konsehal Jerry Guardo human kini mibiya sa Team Rama. Kun mapupos na ang tulo ka buwan nga pagsuspenso kang Guardo pinaagi sa kamandoan sa Ombudsman, itudlo na usab siya nga deputy mayor for infrastructure.

Gitug-an usab ni Osmeña nga miadto siya sa condominium ni kanhi kongresista Tony Cuenco alang sa pagbalik ni Cuenco sa BOPK, apan dunay gipangayo si Cuenco nga kondisyon nga wala nila mauyoni.

 Kini mao nga sa sunod eleksiyon, si Tony Cuenco gustong modagan pagka bise mayor samtang usa sa iyang mga anak kinahanglang iapil sa line-up sa mga konsehal. “So my message to (former mayor Michael) Rama you can have him, imo nana”, matud ni Osmeña. Rene U. Borromeo ug Decemay P. Padilla (BANAT NEWS)