Shootout : Lider ng ‘Bajar holdup gang’ utas
MANILA, Philippines - Patay ang isang 32-anyos na sinasabing lider ng notoryus na ‘Bajar Holdup Gang’ na responsable sa serye ng holdapan at pagtutulak ng iligal na droga makaraang manlaban sa mga operatiba ng Manila Police District-Station1, kamakalawa ng gabi.
Hindi na umabot ng buhay sa Tondo Medical Center ang suspek na si Celito Jarabillo, alyas Sitong Tulak, residente ng Building 16, Temporary Housing, sa Tondo, sanhi ng tinamong mga tama ng bala sa katawan.
Sa ulat ni SPO4 Glenzor Vallejo ng Manila Police District-MPD-Homicide Section, dakong alas-11:05 ng gabi nang maganap ang barilan sa pagitan ng suspek at mga miyembro ng Follow-up Unit at Intelligence Unit ng MPD-Station 1, sa lugar ng una.
Ikinasa umano ang anti-criminality campaign sa pangunguna ni P/Senior Insp. Edwin Fuggan at kabilang sa pakay na arestuhin ang grupo ni Jarabillo.
Nakita nila si Jarabillo sa labas ng bahay subalit alerto umano ang suspek na agad na nagbunot ng baril at pinaputukan ang mga operatiba bago nagtatakbo.
Wala namang tinamaan sa mga pulis na mabilis na hinabol ang suspek na pumasok sa kaniyang bahay habang nagpapaputok dahilan para gumanti na rin ng putok ang mga pulis at tamaan ang suspect.
Kabilang si Jarabillo sa drug watchlist ng presinto, bukod sa dami ng reklamong natatanggap na ang grupo nito ang sangkot sa serye ng holdapan sa naturang lugar.
Nakuha mula sa suspek ang mga plastic sachet na pinaniniwalaang gamit sa pagre-repack ng shabu, iba’t-ibang drug paraphernalia at isang sumpak na may 3 bala at isang basyo.
- Latest