Ngano nga giisnab si Rama
Bisan kinsa na lang ang gidangpan ni kanhi Cebu City Mayor Mike Rama nga makatabang niya sa pagpakigtagbo ni Presidente Rodrigo Duterte aron nga mapapas na ang iyang ngalan gikan sa listahan sa mga gipasanginlan nga drug protectors.
Apan pulos pakyas ang mga pasalig nila ni Executive Assistant Bong Go, PNP Director General Bato dela Rosa, PDEA Director General Isidro Lapeña, Senate President Koko Pimentel, Senador Alan Peter Cayetano, Presidential Legal Counsel Salvador Panelo, Presidential Assistant Mike Dino ug Presidential Adviser Addie Sitoy. Nausban hinuon og hingalan ni Duterte si Rama karong bag-o.
* * *
Mahimong nisuway gyud sila paghangyo ni Duterte paghatag ni Rama og higayon sa pagpanalipod sa iyang kaugalingon. Mahimong gibalibaran sila ni Duterte tungod sa kadaghan sa mas dinalian niya nga mga gimbuhaton.
Mahimo sab hinuon nga giulug-ulogan lang nila si Rama. Apan wa gyuy bisan usa nila nga nangahas paghangyo kay nahibawo nga wa’y panahon si Duterte sa pagpakigtagbo sa tanang naapil sa nagkataas nga listahan sa mga gilambigit sa negosyo sa ilegal nga drugas, gawas lang kun Peter Lim ang imong ngalan. Bisan unsa pa’y hinungdan, padayong nabawo si Rama.
* * *
Nganli si Rama og bisan unsa apan dili siya kapasanginlan nga kuwang og agwanta. Dili siya ingon niana kadali nga motahan sa paglaom nga makatsamba ra siya pagpakigtagbo ni Duterte ug nga iyang makumbinser ang presidente nga wa siya modupa ni bisan kinsa nga durugista.
Nabalaka hinuon ko nga kun dili masubrahan ra nga pagpamugos sa iyang kaugalingon, mahisama siya ni Daanbantayan Mayor Vic Loot, nga human niinsistir nga wa siya labhi ni Duterte sa tigum sa mga mayor didto sa Malakanyang, gi-adlaw-adlaw hinuon siya og balikas sa presidente.
* * *
Kay kun wa pa siya makabantay, si Duterte mao ang matang sa lider nga dili ganahan nga moangkon og sayop. Molusot nga nagkomedya o wa masabti ang iyang sulti apan dili mahitabong moangkon nga nasipyat siya.
Giusab lang ang sulti sa wa’y pagpangayo og pasaylo, sama sa pangangkon nga duha ka polis ang nangamatay matag adlaw sa gubat sa drugas ug sa pasalig nga doblehon ang suweldo sa tanang polis ug sundawo.
Gawas pa, dili mahitabong moangkon si Duterte nga wa’y ebidensiya batok ni Rama.
* * *
- Latest
