Toga sa graduation di pinugsanay

CEBU, Philippines - Wala gidasig ni Talisay City Schools Division Superintendent Leah Noveras ang pagpasul-ob og toga alang sa graduation ceremony sa mga tinun-an.

Matud ni Noveras nga opsiyonal ang pagsul-ob sa toga ug walay kamanduan ang Department of Education (DepEd).

Apan iyang giklaro nga wala sab kini nagpasabot nga dili na gyud magsul-ob ang mga tinun-an og toga sa ilang graduation ceremony.

Kini tungod kay magdepende kini sa panagtigum sa Parents-Teachers Association (PTA). Sa nilabay nga katuigan magsul-ob gyud og toga ang mga bata nga mogradwar.

Si Noveras nagkanayon nga kun aduna man gani mga reklamo ang mga ginikanan kalabot sa graduation abli ang iyang buhatan sa pagdawat niini aron ilang matagaan dayon og aksiyon.

Ang DepEd adunay kamanduan sa matag tunghaan nga himuon ang ilang graduation nga solemne, simple ug mahinungdanon nga dili na mogasto og dako nga kantidad.

Sa pagkakaron nagsugod na sa pagsabot-sabot sa mga ginikanan kun unsa ang ilang andamon panahon nga mopaso na ang ilang mga bata sa entablado aron kuhaon ang ilang diploma nga gihagoan sa pipila ka tuig sa pagtungha. (BANAT NEWS)