5 sikop tungod sa illegal suwertres
CEBU, Philippines - Nasikop ang lima ka tawo nga nagpasiugda og ilegal nga suwertres sa gihimong anti-illegal gambling operation sa kapolisan sa Upland sa Dakbayan sa Danao pasado alas 8 sa miaging gabii.
Giila ni PO1 Clover Butaslac sa Danao Police Station ang una nilang nadakpan nga si Junnel Bariga taga Barangay Suba. Ang kauban niini nga nadakpan mao sila si Eljun Mata, Panilo Gica, Clint Mantos, ug Jennievev Pason nga pulos taga Barangay Tuburan Sur.
Matud ni PO1 Butaslac nga ang hepe sa Anti-Illegal Gambling Task Force sa Danao nga si PO3 Phil Restauro mihimo sa maong operasyon sa dapit.
Ang suspek nga si Bariga kinsa nakamatikod sa mga polis, nidagan paingon sa sulod sa panimalay nga maoy nakaaghat sa kapolisan sa paggukod niini hinungdan nga kini gisikop.
Nunot sa pagkasikop kang Bariga, ang laing upat nga didto sa sulod sa maong panimalay nga nagtali sa mga kombinasyon sa numero sa suwertres ang lakip nga gisikop.
Nakuhang ebidensiya sa kapolisan kang Bariga mao ang 3 ka tally sheet, P300 nga salapi, calculator ug mga ballpen. Samtang sa mga kauban niini, nakuhaan og duha ka calculator, mga yellow pad, 20 ka tally sheet ug salapi nga nagkantidad og P1,800 nga gituohang halin sa illegal suwertres.
Si PO1 Butaslac nagkanayon nga kasamtangan karon nilang giandam ang kaso batok sa lima ka mga dinakpan nga kalapasan sa Republic Act 9287 o Anti-Illegal gambling nga hugtanong gipatuman sa kapolisan. - /DILT)(BANAT NEWS)
- Latest