Product revolution, sagot sa kawalang trabaho ng mga Pinoy
MANILA, Philippines - Kung may rebolusyon laban sa ipinagbabawal na gamot si Pangulong Duterte, kailangang magsagawa rin siya ng ‘product revolution’ na siyang sagot sa kawalang trabaho ng mga Pilipino.
Ayon sa kilalang inhinyero na nagkamit ng medalyang ginto mula sa Estados Unidos dahil sa kanyang imbensyon, sinabi ni Engr. Aquilino Tubigan, Jr., na mas kailangan ng mga mamamayan ang rebolusyon sa paglikha ng mga produkto.
Sa ngayon aniya, ang nililikha ng sistema ng edukasyon sa bansa ay mga manggagawa upang maging competitive, ngunit higit aniyang mahalaga na mismong ang kabataang Pilipino ang bigyan ng pagkakataon upang gumawa ng mga produkto at industriya na sasagot sa problema ng bansa sa unemployment.
Ayon kay Tubigan, isang Filipino inventor na nakaimbento ng mobile charging station na tinatawag na i-charj bata pa lamang ay kailangan ng turuan ang mga kabataan na masaliksik ang mga kaya nilang gawing produkto na maaaring ipagbili sa merkado.
Inihalimbawa ni Tubigan ang pagbibigay niya ng pagsasanay o skills sa mga Out-of-School Youth (OSY) sa Inventors School of the Philippines, na pagkatapos ng ilang linggong kasanayan ay mayroon ng nagawang mga produkto na maaaring ibenta at lumikha ng trabaho.
- Latest