Torre Lifetime Achiever sa PSA Awards Night

MANILA, Philippines - Habang nagkakaedad, lalong gumagaling si Grandmaster Eugene Torre.

Sa edad 65, dinala ni Torre ang kampanya ng Pinas sa 2016 Chess Olympiad sa Baku, Azerbaijan tulad ng kanyang ginagawa nang siya ay bata pang top chess player hindi lang sa Philippines kungdi sa Asia.

Sa isa na namang record-breaking 23rd appearance sa biennial meet, si Torre ang naging best player sa four-man Filipino team at sa katunayan ay sa buong tournament  kung saan nagtapos siyang walang talo para sa  impresibong 10 points mula sa possible 11 point bunga ng kanyang siyam na panalo at dalawang draws.

Sa likod nito ay naka-bronze lamang si Torre sa Board 3 dahil base sa format, ang tatanggap ng gold medal ay player na may pinakamataas na performance rating.

Ngunit ang kanyang performance ay nagningning sa 42nd edition ng Olympics ng chess. Ito ang unang medal ni Torre sa event matapos manalo ng silver sa Board 1 (9 wins at 10 draws) noong 1974 Olympiad sa Nice, France kung saan niya nakuha ang kanyang Grandmaster norm, na siyang kauna-unahan sa Asia  noon.

Dahil sa kanyang mahusay na performance sa Azerbaijan, karapat-dapat lamang na parangalan si Torre ng Lifetime Achievement Award sa nalalapit na Philippine Sportswriters Milo.

Ang most accomplished Filipino chess player of all time  na si Torre ay isa sa top awardees na pararangalan ng  pinakamatandang media organization sa bansa sa gagawing pagtitipon ng mga sporting heroes at heroines na handog din ng Cignal/Hyper TV sa February 13 sa Le Pavillon sa Pasay City.

Si Rio De Janeiro Olympics silver medalist Hidilyn Diaz ang tatanggap ng 2016 Athlete of the Year award.

Igagawad din ang Executive of the Year, National Sports Association of the Year, Mr. Basketball, Mr. Golf, Mr. Football, Ms. Volleyball at ang special choice ng kasalukuyang PSA president na si Riera Mallari ng The Standard sa formal rite na inisponsoran din ng Smart, Foton, Mighty Sports, PBA, Accel, Gold Toe, SM Prime Holdings Inc.,. Globalport, Rain or Shine, ICTSI at MVPSF.

Kikilalanin din ang mga Major awardees sa iba’t ibang sports, magbibigay ng citations, Tony Siddayao Awards at ang Milo Male and Female Junior Athletes of the Year sa event na  suportado rin ng Philippine Sports Commission, Philippine Charity Sweepstakes Office at Federal Land.