Nagkahanap na ang usbaw sa SSS pension

Dako ang tinguha ni Presidente Digong Duterte, nga sumala sa iyang gisaad, nga  mahatag gayud ngadto sa mga SSS retirees ang usbaw sa pension  Apan ang iyang mga finance managers, sila si Budget Secretary Banjamin Diokno, Socioeconomic Planning Secretary Ernesto Pernia, ug Finance Secretary Carlos Dominguez, miinsister nga kun ihatag ang usbaw ug dili usbawan ang kontribusyon sa mga miyembro nga nagtrabaho pa, mabangkaruta gayud ang SSS.

Alang kanila, husto si kanhi Presidente Noynoy Aquino pag-veto sa HB No. 5842.  Hinumdoman nga overwhelming unta kaayo ang botasyon pag-approve ning maong balaudnon, ania: House of Representatives – 211 vs. 0 vote; Senate: 15 vs. 1 vote. Ang mga senador ug mga kongresista nagpasagad lang?

Mabangkaruta ba ang SSS? Ato na kining gituki dinhi ug tungod kay nag-anam na man hinoon kini’g kahanap, ato ning hisgutan pag-usab. Ang SSS Charter nagkanayon: “The government of the Republic of the Philippines accepts responsibility for the solvency of the SSS. The government shall regularly appropriate the necessary funds to augment SSS funds & benefits.”

So, responsibilidad sa gobiyerno nga dili kahutdan og kuwarta ang SSS. Kun nag-subsidize ang gobiyerno sa mga GOCCs, sama sa PCA, NAPOCOR, NFA, ug NIA, nganong dili man sila maka-subsidize sa SSS kun kini maproblema sa pundo nga salapi? Sa tuig 2015, ang total nga subsidy nga nahatag sa gobiyerno ngadto sa mga GOCCs mikabat og P78.01 bilyones. Nganong dili man mapiksan ang SSS niini?

Ang SSS adunay kapin sa P325 bilyones nga collectible.  Matud ni Senador Richard Gordon, kinahanglan mohimo’g mga lakang ang SSS sa labing dali nga panahon pag-improve sa ilang collections ug investment portfolio.

Kinahanglan kunhoran ang subrang gasto ug ang dagkong mga suweldo ug allowances sa kadagkoan sa SSS nga sa tuig 2014 lang, mikabat kini’g P117 million, walay labut sa giingon nga-exorbitant expenditures.

Dugang niini ang SSS adunay nagyaka lang nga mga kabtangan nga mokantidad og P17.956-B: 102 condo units sulod sa 7 ka building; 44,000 sqms of store/office spaces; 16 ka dagkung building ug 169 parking lots, nga unta ila kining gipaabangan o gibaligya.

Ang COA nakakita og unauthorized allowances sa SSS mikabat og P71 milyones nga ipauli; P8.168-B unremitted employer contributions ug  P61.226 B nga wala bayri nga mga utang.

Busa, daghan og kuwarta ang SSS. Nag-petition man gani sila, nangayo og P1 million nga performance bonus alang sa matag usa kanila nga executive.

Kinahanglan ba nga usbawan ang SSS contribution?