Bebot itinumba
MANILA, Philippines - Dead-on-the-spot ang isang babae nang pagbabarilin ng dalawang hindi pa kilalang mga suspek sa Port Area, Maynila, kahapon ng umaga.
Walang nakitang anumang pagkakakilanlan sa biktimang inilarawan sa edad na 20-25, nasa 4’8 lang ang height, nakasuot ng checkered pink na bestida at shorts, blue ang kulay ng tsinelas, blue ang plastic wrist watch at silver ang hikaw at singsing.
Sa inisyal na ulat ni PO3 Ryan Jay Balagtas, ng Manila Police District-Homicide Section, naganap ang insidente dakong alas-6:00 ng umaga sa Railroad St., sakop ng Brgy. 650, Port Area.
Nakita lamang na kausap ng dalawang lalaki ang biktima at hindi nagtagal ay nagtatalo na sila hanggang sa paputukan ang biktima ng ilang ulit sa katawan kapwa armado ng kalibre .45 at kalibre 9MM na mga suspek.
Nang bumulagta ang biktima ay tumakas naman ang mga suspek at isa pang lalaki na kasabwat na nagsilbing look-out ang kasabay nilang pumasok sa eskinita sa Railroad St.
Tumanggi ang mga nakasaksi na magbigay ng pahayag at ilan din ang nagsabi na hindi kilala sa lugar ang biktikma na posibleng dumayo lamang.
May teorya na posibleng iskorer ng shabu ang biktima na dumadayo sa lugar at hindi nakapag-remit kaya itinumba. May teorya rin na posibleng nagpakamalang ‘asset’ ng pulisya ang biktima kaya ito itinumba.
Patuloy pang inaalam ang mga pagkilanlan ng mga sangkot at kung ano ang motibo sa krimen.
- Latest
