Pacquiao iniisip ang trabaho sa senado
Kaagad uuwi matapos ang laban kay Vargas
LOS ANGELES – Ngayon pa lamang ay iniisip na ni Manny Pacquiao ang kanyang trabaho sa Senado.
Sinabi ni Pacquiao na kaagad siyang uuwi ng Pilipinas matapos ang kanilang upakan ni Mexican-American world welterweight titlist Jessie Vargas sa Nobyembre 5 sa Thomas & Mack Center sa Las Vegas, Nevada.
“Uuwi agad ako after the fight,” sambit kahapon ni Pacquiao sa isang tanghalian.
Tatangkain ng 37-anyos na si Pacquiao na agawin sa 27-anyos na si Vargas ang suot nitong World Boxing Organization welterweight crown na dalawang beses na niyang nakamit.
Halos apat na linggo siyang nagsanay sa Elorde Gym sa Pasay City kasama sina chief trainer Freddie Roach at assistant Buboy Fernandez.
Ang training camp ni Pacquiao sa Wild Card Boxing Gym sa Hollywood, California ay isasara sa publiko mula sa direktiba ni Roach sa kanyang security.
Ayon sa Senador, sasakyan kaagad niya ang unang eroplanong aalis ng Las Vegas isang araw matapos ang kanilang laban ni Vargas para makabalik ng Manila sa Martes ng umaga (Manila time) at dumalo sa sesyon ng Senado sa hapon.
Magpapatuloy ang sesyon ng Senado sa Lunes at hindi kaagad makakadalo si Pacquiao maliban na lamang kung mapapabagsak niya si Vargas sa first round, maliligo ng mabilis at dumiretso sa airport para umabot sa evening flight kung mayroon man.
Aminado si Pacquiao na hindi siya makakadalo sa first session sa Nobyembre 7 matapos ang Senate recess.
“One day absent ako. Hindi na siguro masama ang isang araw,” wika ni Pacquiao.
Matapos mailuklok sa Senado sa eleksyon noong Mayo ay nangako ang dating Sarangani Congressman na hindi siya liliban sa anumang sesyon ng Senado.
Sa kanyang termino bilang Congressman ay kinondena ang maraming beses niyang pagliban sa Kongreso tuwing siya ay may laban.
Sinabi ng kanyang public information officer na si Aquiles Zonio na may perfect attendance ang eight-division champion bilang Senador.
Kahit nagsasanay ay tinitiyak ni Pacquiao na makakadalo siya sa afternoon sessions ng Senado.
Ayon kay Pacquiao, may mahalagang Senate deliberation sa Martes kaya gusto niya kaagad makauwi.
“Budget deliberation,” sambit ni Pacquiao na aktibong lumalahok sa mga pagdinig sa Senado.
Sa kanyang mga nakaraang laban ay nakaugalian na ni ‘Pacman’ na manatili ng ilang araw sa Los Angeles para magpahinga at magbakasyon.
Ngunit ngayon ay kailangan na niyang umuwi kaagad ng Pilipinas para maipagpatuloy ang kanyang tungkulin sa Senado.
- Latest