Lalis sa pantalan

Gihangop ni Consolacion Mayor Teresa Alegado ang pagkaapil sa higanteng proyekto sa iyang lungsod sa daghang kauyonan nga napirmahan atol sa pagduaw ni Presidente Rodrigo Duterte sa Beijing sa niaging semana.

Nagkauyon ang Mega Harbour Port and Development Inc. ug ang CCCC Dredging Co. alang sa $328 milyones (P16 bilyones) nga Cebu International and Bulk Terminal Project.

Napirmahan ang kauyonan sa Beijing tulo ka semana human napirmahi ang kontrata tali sa Mega Harbour ug sa Munisipyo sa Consolacion pagtukod sa higanteng pantalan sa Barangay Tayud. Bisan wa pa siya mapahibawo sa Mega Harbour sa mga detalye sa kauyonan uban sa CCCC Dredging, kumbinsido si Alegado nga ang kalamboan nagmatuod sa katakos sa Mega Harbour sa pagpatuman sa proyekto.

*  * *

Sa iyang bahin, nipasidaan si General Manager Edmund Tan sa Cebu Port Authority (CPA) nga bisan sa pinirmahay sa Beijing dili gihapon mapatuman ang kontrata sa Consolacion ug Mega Harbour kay:

* Ang CPA ang may eksklusibong gahum sa pagtukod ug pagdumala sa tanang pantalan sa Sugbo;

* Dili sila mahimong laktawan bisan may kasosyo na ang Mega Harbour nga taga China kay ang CPA ahensiya sa nasudnong gobiyerno ug dili mahimong papason aron lang pagpalusot sa usa ka transaksiyon; ug

* Ang CPA ang unang gitanyagan sa RII Builders, ang inahan nga kompaniya sa Mega Harbour, apan wa nila dawata kay maalkanse ang gobiyerno sa transaksiyon.

* * *

Nipasabot si Alegado nga nisulod siya sa kontrata uban sa Mega Harbour kay dugay na kaayo sila nga nagpaabot apan hangtod karon wa pay klaro kun makakuha ba og pundo ang CPA alang sa higanteng proyekto.

Iyang nahibaw-an nga ang Korean developer nga gikasabot sa CPA kinahanglan pa nga mangutang sa Korean Official Development Assistance (ODA). Matud ni Alegado 11% ra ang bahin sa Consolacion sa kinatibuk-ang kita sa bag-ong pantalan apan ilang gidawat kay wa may gasto ang munisipyo bisan usa ka dako.

Gawas sa ilang pagpasar sa ordinansa nga nagtugot sa public-private partnership (PPP) ug pagkuha sa pagtugot sa Cebu Provincial Reclamation Authority (CPRA), niingon si Alegado nga ang Mega Harbour nay nipasalig sa tanang panginahanglan.

* * *

Nagmahay si Tan ni Alegado kay wa mangiyugpos ang CPA sa proyekto. Nakakuha na sila sa pagtugot sa International Coordinating Committee (ICC) ug nagkinahanglan na lang og bendisyon sa NEDA Board nga gipangulohan ni Presidente Duterte.

Gibalibaran ni Tan si Alegado dihang nangutana pilay bahin sa Consolacion. Gipasaligan hinuon nga ang munisipyo makakolekta og mas daghang buhis sa daghang negosyo nga manguhong tungod sa presensiya sa pantalan.

Nipasidaan sab si Tan nga ang publiko magbaguod sa mas dagkong bayranan kun mahinayon ang transaksiyon sa Mega Harbour kay kinahanglang mamawi sa P16 bilyones nilang puhonan.

 ([email protected])