EDITORYAL - Republic Act 9003

Dili moabot sa ingon niini kagrabe ang problema sa siyudad sa Sugbo kun asa kini molabay sa mga basura kada adlaw kun sa pagsugod pa lang sa implementasyon sa Republic Act 9003, kon Ecological Solid Waste Management Act, giseryoso na unta dayon.

Ang maong balaod gihimo aron mapanalipdan ang kalikupan ug kinaiyahan gikan sa makadaot nga epekto sa polusyon nga mamugna sa mga basura nga kada adlaw gitambak sa mga tawo.

Gimando sa maong balaod nga kinahanglang ang tanang mga local government units adunay sanitary landfill subay sa mga probisyon ug implementing rules and regulations (IRR) niini.

Kinahanglan usab nga adunay kaugalingong mga material recovery facilities (MRFs) ang mga LGUs ug lakip na ang mga barangay aron pinaagi   niini mamenosan ang gidaghanon sa mga ilabay nga basura diha sa mga sanitary landfill.

Laing probisyon nga wala sunda mao ang waste segregation o pagbuwag sa malata ug dili malata nga basura nga kaakohan sa mga tagbalay. Sayon na lang unta sa mga garbage collectors ang pagsunod sa mga probisyon sa maong balaod pinaagi niini.

Maihap pa lang sa kuyamoy ang mga LGUs nga 100 porsiyentong nakatuman sa mga probisyon sukad napasar ang balaod  16 ka tuig na ang nakalabay.

Walay mga MRFs, walay klarong pagbahig sa basura, ug labaw sa tanan, aduna pa’y ubang mga barangay nga walay klarong oras sa pagkolekta sa basura tungod kay guba ug dili matagna kun kanus-a pa usab modagan ang ilang garbage trucks.

Karon may gimando na nga bag-ong skedyul sa paghakot sa basura, apan sa gihapon daghang barangay ang wala motuman niini kay daghan sila og mga rason. Dunay uban nga makatarunganon ang rason apan aduna say uban nga pasumangil ra gyud.

Nagproblema na karon ang siyudad kun asa ilabay ang basura. Dili kinahanglan ang lapad nga sanitary landfill kun gituman lang ang mga probisyon sa RA 9003.