Obrero tinodas dahil masamang tumitig

Dahil lamang sa pagtitig, isang obrero ang nasawi matapos itong undayan ng saksak ng isang lalaki na minasama ang ginawa dito sa loob ng isang restaurant kamakalawa ng gabi sa lungsod ng Makati.

Binawian ng buhay habang ginagamot sa Ospital ng Makati ang biktimang si Romy Romero, 44, may asawa, ng KKK Talipapa, dahil sa mga tinamong saksak sa katawan.

Mabilis na tumakas ang hindi pa nakikilalang suspek at pinaghahanap ngayon ng pulisya.

Sa imbestigasyon ng pulisya, naganap ang insidente dakong alas-10:45 ng gabi sa Sawali, Ihaw-Ihaw Restaurant sa Sgt. F. Yabut st., Bgy. Guadalupe Nuevo.

Ayon sa ilang saksi, hindi sinasadyang natitigan ng biktima ang suspek.

Minasama ito ng suspek hanggang sa magkaroon ng mainitang pagtatalo sila ng biktima.

Kinuha ng suspek sa bulsa nito ang nakatagong balisong at inundayan ng saksak ang naturang biktima. (Ulat ni Lordeth Bonilla)