Importasyon sa bugas nagpabiling tentasyon

Ang importasyon sa bugas nagpabilin gihapon nga tentasyon alang sa ubang opisyal sa gobiyerno nga gustong magpaburot sa bulsa samtang anaa sa katungdanan. Mao kini hinungdan nga gitaktak ni Presidente Rodrigo Duterte ang babayeng undersecretary sa Office of the President kay nang-inpluwensiya kini aron balihon ang desisyon pag-deny sa import permit alang sa bugas.

Kining maong undersecretary, sinaligan (ug protege) ni Cabinet Secretary Leoncio “Jun” Evasco Jr. ug didto kini madestino sa iyang buhatan. Niadtong miaging adlaw, mitingog si Undersecretary Mia Chiara Halmen Valdez sa alegasyon nga pagpangurakot gamit ang import permit sa bugas. Nagpa-interview siya sa media ug mipasangil nga si NFA administrator Jayson Aquino adunay gipaboran nga mga importer og bugas.

May punto si Usec. Valdez. Apan tay’m pa ra gud, nganong suheto man kaayo si Valdez sa mga transaksyon sa NFA? Kun si Valdez undersecretary sa opisina ni Jun Evasco, nganong nakaapil-apil man siya sa pag-release sa import permit nga trabaho man kini sa NFA? Ang opisina ni Jun Evasco isip Cabinet Secretary, anaa sa Mabini Hall sa Malacañang nga nahimutang sa San Miguel, Manila.

Ang opisina sa NFA sa kauluhan anaa mahimutang sa Quezon City. Apan nganong ganahan man si Valdez nga makaapil sa mga transaksyon sa NFA? Si Valdez tawo ni Evasco. Kapin duha ka tuig ang nakalabay, si Valdez nagpatudlo ni Evasco unsaon pagdaog kay nagplano siyang modagan pagka-mayor sa ilang lugar sa Balilihan, Bohol.

Naglibog usab ko nganong naapil ang buhatan ni Evasco niining isyuha nga Cabinet Secretary man unta siya. Usa pa, naa man si Agriculture Secretary Manny Piñol nga mas suheto sa isyu sa agrikultura, kay kang Evasco. Laing sinaligan ni Evasco nga gitaktak sa puwesto mao si Pete Laviña.

Laing isyu nga sagubangon ni Evasco mao ang pasangil nga gipanguwarta sa iyang tawo ang mga programa sa mga lubi nga gidumala unta sa Philippine Coconut Authority.

Ikatulong isyu kining kontrobersiya sa NFA. Naa pa kahay lain? Sumala pa sa Rappler, si Evasco dili maayo og buot sa Special Assistant to the President nga si Bong Go.

Gani, adunay pasangil nga mas gipaboran ni Bong Go si NFA Administrator Jayson Aquino. Nasabtan hinuon nako nga ang programa sa importasyon nga giduso ni Aquino mao ang government-to-government, nga ang ipasabot mao nga ang gobiyerno sa Pilipinas ang makig-estorya sa gobiyerno sa Thailand, Pakistan, India, ug uban pa aron deretso ang gobiyerno mamalit og bugas.

Mas maayo kini kay sa isalig sa mga pribadong importer nga sa kadugayan mahimong laing rice smuggler.