Swimming coach, pumalag sa holdap, kritikal
MANILA, Philippines - Nasa malubhang kalagayan ang isang lalaking swimming coach makaraang barilin sa katawan ng isa sa dalawang holdaper nang pumalag ang una sa mga salarin, kamakalawa ng hapon sa Malabon City.
Nakaratay ngayon sa Chinese General Hospital ang biktimang nakilalang si Rommel Solita, 52, at residente ng Brgy. Taniong, ng naturang lungsod.
Sa ulat, nakatayo ang biktima sa tapat ng isang vulcanizing shop sa may C4 Road malapit sa Pampano Street, Brgy. Longos at naghihintay para mapaayos ang kanyang flat na motorsiklo dakong alas-2:30 ng hapon nang sumulpot ang dalawang salarin at pilit na inagaw ang kanyang belt bag na naglalaman ng pera, cellular phone at iba pang personal na gamit.
Pumalag naman ang biktima kaya binaril siya ng isa sa mga salarin ngunit hindi pa rin nabitawan ang bag kaya nagpasyang tumakas na ang mga suspect. Nagawa pa namang mamaneho ng biktima ang kanyang motorsiklo at makauwi ng bahay kung saan siya sinaklolohan ng anak at isinugod sa pagamutan.
Patuloy naman ang imbestigasyon ng pulisya upang makilala ang dalawang holdaper.
- Latest
