Massive clean-up himoon batok dengue

CEBU, Philippines - Subay sa pagdeklara nga ipa-ubos sa state of calamity gumikan sa dengue ang tibuok lalawigan sa Sugbo, gitun-an sa hunta probinsiyal ang pagpamulta sa mga kabalayan nga dili manglimpyo. 

Si Bokal Christopher Baricuatro, chairman sa Committee on Health sa hunta probinsiyal nagkanayon nga gitun-an nila ang sugyot sa Department of Health nga pamultahon ang mga dili manglimpiyo sa ilang kabalayan.

Apan matud niini nga kun siya ang pabut-on dili na angay magpahamtang og multa kay kinahanglan ang tanan magtinabangay sa pagpanglimpiyo aron malikay sa sakit nga dengue.

Subay niini ang kagamhanan sa probinsiya magpasiugda og “massive clean-up” nga himoon karong Nobiyembre 4.

Ang Department of Education (DepEd) ug uban pang mga hingtungdang buhatan patabangon sa maong kalihukan.

Niadtong Lunes ang PHO nagsugod na sa clean-up drive sa mga eskwelahan. Gani matud ni Dr. Rhea Mar Angtud, ang Provincial Schools Division Superintendent nga nagpahigyon na sila og “4 o’clock habit” sugod niadtong niaging semana.

Gibutyag usab ni Baricuatro nga nagpadala na sila og suwat sa mga mayor ug mga kapitan nga magsugod na lang sila sa clean-up drive sa ilang mga lugar ug dili na mohuwat sa massive clean-up drive sunod buwan, aron mokunhod ang kaso sa dengue sa probinsiya.

Gipahibawo usab ni Danilo Rodas, ang Provincial Budget Officer nga aduna pay P9 milyones nga nahabilin sa Quick Response Fund nga magamit subay sa deklarasyon sa state of calamity. Kun ugaling magkuwang kini, mahimong mo-realign og pundo gikan sa P70 milyones  nga nahabilin sa disaster preparedness.

Sa pagbana-bana ni Baricuatro, muabot sa P1.5 milyones ngadto sa P1.6 milyones  ang magamit alang sa pagsumpo sa pagsaka sa kaso sa dengue. Diin ang P1.350 milyones nga gahin ipalit og larvicides ug ang uban igahin sa uban pang gamitonon. Brenda D. Batuto ug Le Phyllis F. Antojado