EDITORYAL - Kaangayan sa tanan

Sama sa gipaabot, mitingog gyud ang Uropa kabahin niining mga nahitabo karon sa Pilipinas ubos sa pamunoan ni Presidente Duterte, ilabi na niining iyang gubat kontra ilegal nga drugas ug kining nahitabo karon kang Senador Leila de Lima.

Ang European Parliament mao ang parliamentary institution sa gamhanang European Union, sama sa Council of the European Union ug European Commission, aduna usab kini legislative function sa EU. Wala kini gidapigan sa mga isyu nga nahitabo karon sa Pilipinas. Gusto ra nila nga mahatagan og patas nga pagtagad ug hustisya ang tanan, suspek man o mga tigpatuman sa balaod.

Ang European Parliamentarians nipagawas og resolusyon nga nag-awhag sa United Nations Human Rights Council ug sa European Union paghimo og independenteng imbestigasyon kabahin niining mga extra-judicial killings sa war on drugs ni Duterte. Miinsister ang kapolisan nga nanukol ang mga napatay sa anti-illegal drugs operations. Dili unta sila masilo kun adunay international body nga manguti-kuti bahin niini kay ang mga ebidensiya mismo maoy mag-clear kanila sa tulobagon.

Gusto usab sa maong organisasyon nga susihon kining mga kaso sa kapin kuwatro mil nga mga gipamatay sa “vigilantes” nga mura’g bugnaw ra kaayo ang aksyon sa kapolisan. Ang kadaghanan sa mga biktima giingong mga drug personalities ug ang uban pa gani mga drug surrenderers. Sa kaso usab ni De Lima, gusto sa maong grupo nga dili apilan og pamolitika kining paggukod kaniya, kun tinuod man nga nalambigit siya sa negosyo sa ilegal nga drugas sa New Bilibid Prisons.

Daghan ang nagtuo nga si De Lima biktima sa “political persecution” ug hinimo-himo ra ang mga kasong kriminal nga gipasaka kaniya aron siya pahilumon sa paggukod niya kang Duterte kabahin sa mga extra-judicial killings. Kun balaod maoy ipatigbabaw, ngano nga dili man kini himuon? Sa ngalan sa kaangayan sa tanan, dili ba mas makaayo kun kini maoy sundon?