Momenos gyud ang traffic
Kanindot kon mapadali ang pagpatuman sa dul-an P60 bilyones nga road projects dinhi sa Sugbo kay sigurado nga makapamenos kini sa problema sa trapiko. Ang maayong balita niini kay si DPWH Secretary Mark Villar misuporta niining maong proyekto.
Unya, gipasalig sab ni Presidential Assistant for Visayas Michael Lloyd Dino nga maninguha siya nga mopaspas ang pagpatuman niining maong mga road projects kay usa kini sa makapalambo sa Sugbo.
Natural, kon walay problema sa trapiko ang usa ka lugar, daghang investors ang mobubo gyud sa ilang puhonan. Dunay karsada nga gikan sa V. Rama Avenue sa Guadalupe nga modugtong sa Gorordo Avenue sa Barangay Lahug. Gastohan kini og mga P1 billion.
May gamay'ng karsada nga nagdugtong na karon sa Guadalupe ug Lahug apan gagmay kaayo nga maglisud gani nga magsugat ang sakyanan, mao nga gipahimoan kini og plano aron mapalambo. Unya, may laing karsada gikan sa Mandaue paingon sa Consolacion ug lahos na sa Liloan nga karon maagian na, apan wala gyud mahuman sa pagpalapad. Gitagan-an sab ni og P25 bilyones.
Laing proyekto mao ang paghimo og coastal road sa Talisay, Minglanilla paingon sa Naga nga gitagan-an usab og P15 bilyones, ug daghan pa nga road projects nga gigahinan gihapon og binilyon ka pesos nga kantidad. Tingali, kining maong mga road projects mauna pa sa pagkahuman sa Cordova-Cebu City bridge project.
Buyno, ang katumanan niining maong mga proyekto isalig nato kang Dino kay siya man gyud ang anaa sa gahum.
***
Adunay pipila ka tawo nga mipalutaw karon og pagduda nga may kalambigitan si Mayor Tomas Osmeña niining gisugdan paghimo nga sanitary landfill diha sa Barangay Binaliw, Dakbayan sa Sugbo.
Ang mga gipaukyab nga report mao nga posible diay kuno nga gisupak ni Osmeña nga ang dakbayan sa Sugbo adto molabay og basura sa pribadong landfill sa Consolacion kay naghimo man diay og bag-ong landfill diha sa Barangay Binaliw.
Buyno, dili gyud nimo kapugngan nga adunay magduda. Kun ako maoy Osmeña, pahingusgan nako ang pagpahunong sa katukoran nianang maong landfill mintras wala pa makakuha og kompleto nga papeles ang tag-iya niini.
Maayo man nga adunay magtukod og landfill, apan kinahanglan nga dili kay mag-una ang construction nga wala pa gani makakuha'g permiso gikan sa Department of Environment and Natural Resources, ingon man sa Cebu City Hall.
Nindot kaayo nga negosyo kining pagdumala og landfill kay ang mga lungsod ug siyudad nga walay kaugalingong landfill, adto man gyud molabay'g basura didto, unya sigurado man gyud nga mobayad.
Ang kagamhanan sa dakbayan sa Sugbo lang daan, mogasto og subra sa P200 milyones sa tipping fee kada tuig. Tambag nako ni Osmeña nga mandoan niya si Konsehal Alvin Arcilla nga estriktuhon ang pagpatuman sa balaod kabahin sa balaod sa environment.
Gitug-an ni Arcilla nga gitudlo siya sa mayor nga maoy chairman sa Cebu City Mining and Regulatory Board ug apil sa katungdanan ni Arcilla ang pagtan-aw sa kalihukan niining maong landfill.
Wala hinoon ko magtuo nga apil si Osmeña sa mga tag-iya niining maong landfill, apan usbon ko, dili makabasol ang mayor nga adunay magduda.
- Latest
