6 pushers, 10 users sikop sa buy-bust

CEBU, Philippines - Nagtapok sulod sa selda sa Consolacion Police Station ang 12 ka tawo nga nadakpan sa buy-bust operation sa Barangay Pulpogan pasado ala-una sa nakalabay nga kadlawon.

Ang mga sakop sa Consolacion Police nga gipangulohan sa hepe nga si Chief Insp. Roderik Ylan Gonzales nisikop ni Jeric Abao Pepito, 21, ang target sa operasyon.

Si Pepito ang taud-taud na nga gipanid-an sa kapolisan sa pag-negosyo og drugas.

Lakip sa nasikop ang duha ka gikatahong sinaligan ni Pepito nga sila si Jison Bayno Manatad, 27, ug Jose Eldie Alone, 50.

Lakip sa nadakpan sila si Mary Ann Alarde, Ernie Saac, Lemuel Isoto, Job Buenaflor, Vicente dela Cruz, Gerardo Altura, Emelito Sacare, Franco Murello ug Ermilo Cabatingan nga gituohang mga kustomer sa suspek.

Nakuha sa mga polis ang 11 gramos nga gituohang shabu nga kantidad og P129, 800.

Samtang nadakpan ang duha ka durugista human gialarma sa kapolisan sa Dakbayan sa Talisay niadtong Lunes sa gabii sa Sitio Magay, Barangay Tangke.

Ang mga dinakpan mao sila si Romvic Hermoso, 32, taga Sitio Tugas, Inayawan, Siyudad sa Sugbo, ug si Kym Lester dela Paz, 20-anyos.

Si PO1 John Xyrus Ilustrisimo sa Talisay City Police Station niingon nga ang mga tawo sa lugar ang nitawag kanila tungod sa armadong tawo sa ilang lugar.

Nakuha gikan sa dinakpan ang .9mm nga armas ingon man usa ka medium pack nga shabu.

Si dela Paz nga mogamit og drugas ang naatlan sab nga kuyog ni Hermoso ug nakuhaan og usa ka gamay nga pakete sa shabu.

Sa Dakbayan sa Lapu-Lapu, nasakmit sa kapolisan ang 0.4 gramong shabu gikan sa duha ka gidudahang pusher sa Sitio Kauswagan, Barangay Bankal sa buy-bust operation.

Si Police Chief Inspector Jaime Tolentino niila sa duha nga sila si Richard Taneo Pulgo, 35, ug Jefrey Aying Ugsang, 25,pulos walay trabaho. Jojo C. Ugdol, Gabriel C. Bonjoc, Rowena D. Capistrano  ug Romeo T. Limpangog (BANAT NEWS)