Ubang fire hydrants dili na matultolan
CEBU, Philippines - Ang konseho sa dakbayan sa Sugbo miawhag sa Bureau of Fire Protection nga mohimo’g imbentaryo ug ilang susihon ang mga fire hydrants dinhi sa dakbayan aron pagsiguro nga kini magamit gyud kun may sunog.
Giaprobahan sa Cebu City Council ang resolusyon nga giduso ni Konsehal Jocelyn Pesquera kinsa nakadawat og mga report nga daghang fire hydrants ang dili na kapahimuslan.
Ang lakang ni Pesquera gihimo tungod kay ang nasud pagka karon nagsaulog sa Fire Prevention Month, apan atol usab niining buwana nga mosiaw usab pag-ulbo ang mga sunog.
Bisan og ang kabomberohan adunay mga mapa kun asa mahimutang ang mga fire hydrants, apan ang uban niini wala na nila matultuli tungod kay anaa na kini sulod sa mga balay.
Nahinumdom si Pesquera nga dunay sunog kaniadto nga miulbo sa Barangay Tejero ug nakaugdaw og daghang panimalay likud sa Blessed Sacrament nga ang mga bombero wala na makakuha og tubig sa fire hydrant sa maong dapit.
Nasuta nga ang maong fire hydrant wala na matultoli sa mga bombero kay giapil diay kini sa pagkural sa tag-iya sa usa ka balay nga nahimutang daplin sa karsada.
Nabalaka si Pesquera nga adunay daghang mga susama niini nga sitwasyon mao nga kinahanglan nga kahimoan dayon kini og diha-diha nga pag-atiman.
Matud ni Pesquera nga kun ang kabomberohan mohimo og inspection sa mga fire hydrants, mahibaw-an nila kun hain kadtong dili na magamit kay wala nay tubig nga moagas ug kadtong gisakop na sa kabalayan. (BANAT NEWS)
- Latest