Banat ( Leaderboard Top ), pagematch: 1, sectionmatch: 1

Wala paabota nga pinaskohan

Wala pa mosidlak ang adlaw nga nanaug sa ilang panimalay si Bartolou sa tinguha nga maabtan niya sa ilang panimalay si Insik Siyungo nga nanag-iya og dakong tindahan nga kanhi niya gitrabahoan isip delivery truck driver niini.

Naglakaw lamang si Bartolou sa iyang pagpaingon sa tindahan ni Insek Siyungo bisan kun daghan pa ang mga PUJ nga nagpaingon sa maong dapit.

Samtang nagpadayon sa iyang paglakaw maoy iyang maaninaw ang nagkidlapkidlap nga mga series light sa kabalayan ug mga parol sa daplin sa kadalanan nga nagtimaan nga nagkaduol na ang mga adlaw sa pagsaulog sa Pasko.

Daw gikusi iyang dughan nga naghunahuna sanglit mingaw man ang Pasko sa iyang pamilya niining panahona.  

Dugay na nga nawad-an og trabaho si Bartolou ug ang pagpanglabada na lamang sa iyang asawa maoy gikuhaan sa matag adlaw nilang panginahanglan.

Duha na ang anak ni Bartolou nga pulos na nagtungha sa elementarya nga usahay manglakaw paingon sa tulunghaan nga walay balon sanglit kanunay man nga walay kuwarta iyang asawa.

Matinud-anon ug kugihan si Bartolou sa iyang trabaho apan kalit lamang kining gitangtang sa Insek dihang naaksidente ang gimaneho niyang delivery truck sa laing sakyanan nga maoy hinungdan nga gikuhaan siya og lisensiya sa pagmaneho sa LTO ug gitangtang pa sa iyang trabaho.

“A-ko di   na patlabaho nimo Batolou,” ni Insek Siyungo pa. Danghak ka nga pagka dlaybel. Ako dako gasto patambal unya bayat pa ko imo gidasmakan nga takyanan nga ang tak-iya mayol ta lungtod.”

“P-pero,” mangatarungan unta si Bartolou ug mohangyo sa iyang agalon nga dili lamang tangtangon sa iyang trabaho.

“Ahh, wala na pilo-pilo,” misagbat ang Insek kaniya nga wala na maminaw sa buot unta niyang pagpasabot niini. 

Giabaga man tuod sa iyang agalon ang tanan niyang balayranan sa hospital apan gitangtang usab sa trabaho ug dili pa paigo gipaimbargo pa sa LTO iyang lisensiya sa pagmaneho.

Hoyhoy ang abaga ni Bartolou nga migawas sa buhatan ni Insek Siyungo nga naghambin og hilabihan nga kaguol.

Sukad niadto nahadiindiin na lamang si Bartolou sa pagpangita og trabaho apan wala gayod siya makakaplag niini.

“Sakit na kaayo akong kamot Bart sa pagpanglabada,” nagmulo si Martina nga iyang asawa. “Giagwanta lang nako kay unsaon wala man gyod kapaingnan.”

“Sige lang Mar,” ni Bartolou pa sa iyang asawa. “Moadto kong Insek Siyungo ugma.”

“Mag-unsa ka man,” nangutana iyang asawa.

“Akong suwayan paghangyo nga iyang lukaton akong lisensiya sa LTO aron makabalik kog drive bisan PUJ o kaha taxi kay kusog man karon ang sakay kay panahon man karon sa Pasko.”

Nahidangat na si Bartolou sa tindahan ni Insek Siyungo ug sa iyang paghidangat sa pultahan maoy iyang gikasugat si Botoy nga kanhi niya truckboy nga dungan                   usab niyang gitangtang sa trabaho.

“B-bay,Bart, nagtisngi si Botoy nga nagtan-aw kang Bartolou. “maayo kay nia ka na.”

“Ngano man?” nakapangutana si Bartolou.

“M-moadto man unta ko karon sa inyo kay ipakuha ka ni Insek Siyungo.”

“Unsay iyang tuyo kanako?” dugang pangutana ni Bartolou kang Botoy.

“Sudla na lang sa iyang opisina bay aron ka masayod sa iyang tuyo,” ni Botoy pa.

Nagdali tuod sa pagsulod si Bartolou sa buhatan ni Insek Siyungo ug sa iyang pagsulod maoy iyang nakita nga daw gibati og hilabihang kalipay ang Insek nga nakakita kaniya.

“Maayo ikaw Batolou nga nia.” Ni Insek Siyungo pa. “Ako dukay na pangita sa imo.”

“H-ha?” ni Bartolou nga daw gibati og kahingangha. “Ngano man diay, Mr. Siyungo?”

“I-kaw balik tlabaho pilo dili dlaybel,” nagkanayon ang Insek. “I-ikaw na ako kel takel tanan nako nekosyo ug ikaw sad tuperbayes tanan tlabahante. Ako hatak nimo dako tuweldo ug hatak pa nako tanan nimo benepisyo.”

Daw wala makalihok si Bartolou sa iyang gilingkoran sa iyang nabati sa gipamulong sa Insek. Ug dili tiaw iyang gibating kalipay niining iyang nadawat ang wala paabotang pinaskohan. (Katapusan)

  • Follow Us: