Banat ( Leaderboard Top ), pagematch: 1, sectionmatch: 1

Dalaga sa Bukid

Gula 2

“Layo ba kaayo ang mga balay gikan dinhi Dong?” gisukna ni Larry kadtong taason nga usa sa tulo ka batan-on.

“Layo-layo g’yud Sir. Ang maayo itulod namo kining imong awto hangtud ngadto sa ibabaw nianang tungason sir, unya mahimo ka na nga magpahaybol lang paingon sa ubos nga nahimutangan sa daghang kabalayan,” sugyot sa batan-on.

Nalipay si Larry nga nakadungog sa sugyot sa tulo. “Sigi dong, tabangi ko ninyo kay ako ra mahibawo nga mohatag kaninyo og bayad.”

Mitabang si Larry sa pagtulod sa awto. Diha ra siya sa gawas nagmaneho sa manobela. Tulin ang ilang pagtulod sa awto. “Pahuway usa mo dong,” matud ni Larry nga mibutang sa kambyo sa permira.

“Kuyaw kaayo didtong dapita sa imong naabereyahan sir, daghang wakwak inigka gabii na,” giingnan si Larry sa laing batan-on. Apan wala lang kini niya tagda kay nagtoo siya nga gikomedyahan lang.

Dihang nahupas na sa hingpit ang ilang kakapoy, subli sila nga miduot na usab sa sakyanan ug miabot ra g’yud sila sa ibabaw niadtong tangason nga bahin sa karsada.

“Pwede ka na nga magpadailos lang ngadto sa ubos Sir kay pulos na kana lugsonon,” matud sa taason nga batan-on. Gitunolan ni Larry og kwarta ang maong mga batan-on agi’g pahalipay.

Tuod man, midailos ra ang sakyanan paingon sa ubos. Nalipay si Larry kay arang-arang na lang nga anha siya makahigda sa karsada uban sa iyang awto apan dili adto sa mingaw nga dapit.

Nakita ni Larry nga dunay babaye sa unahan nga naglukdo og binangan nga kahoy. Iya kining gilabyan apan mihunong siya sa unahan. Nanaug si Larry ug gihuwat ang nagkaduol nga babaye.

“Miss layo pa ba gikan dinhi ang kabalayan? Naabereya man gud ko mao nga adto ra unta ko magpalabay sa oras,” ni Larry pa. Nakabantay si Larry nga may hitsura usab ang maong babaye apan dili kaayo maalinggatan kay binukid ang iyang gisul-ob.

“Mga tunga na lang sa kilometro. Tua man didto ang among balay,” matud sa babaye.

“Kun mao kana, palihug ikarga lang nato sa baggage ang imong kahoy Miss ug sakay na lang diri,” gitanyagan ni Larry ang babaye. “Ayaw uy, maglakaw lang ko,” mibalibad ang babaye.

Gikombinsir g’yud ni Larry ang babaye. “Sige na Miss kay magpatabang ko nimo kun asa ko maayong mo-parking sa akong sakyanan nga walay manghilabot panahon sa gabii,” ni Larry pa. (Sumpayan)  

  • Follow Us: