Banat ( Leaderboard Top ), pagematch: 1, sectionmatch: 1

Ang sinugdanan anaa sa kataposan

Gula 67

“Nga unsa?”

“Nga dili kamo alang sa usa’g-usa.”

“Mao ba?”

“Gentleman kaayo si Cody, Ate. Nagbaton siya’g sportsmanship. Girespetohan niya ang imong desisyon sa pagbugto sa inyong relasyon.”

“Pero ayaw pagkompiyansa kaniya.”

“U-unsay buot mong ipasabot, Ate?”

“Tingalig ikaw ang iyang panimaslan sa akong gibuhat kaniya.”

“W-wa ko ikaw hisabti?”

“Tingalig mangulitawo siya nimo ug sa higayon nga makuha na niya ang imong pagsalig, iya kang pasakitan agi’g balos sa akong gibuhat kaniya.”

“D-dili tingali kana mahitabo, Ate.”

“U-unsay dili?”

“A-ang buot kong ipasabot, d-dili tingali mahitabo nga mangulitawo si Cody nako. Nasabot ko nga hinigala lang ang iyang pagtagad nako. Gawas pa, may uyab na ko. May relasyon kami ni Brendan.”

Wala na motingog si Alexa. Naghinuktok kini sa iyang gisulti.

“Dili ka angay mabalaka nga manimalos si Cody, Ate,” nagkanayon si Colleen. “Buotan siya nga pagka-lalaki.”

“Gipahimangnoan ko lang ikaw,” matud ni Alexa. “Gimahal ko ikaw isip akong manghod. Dili ko gustong pasakitan ka ni bisan kinsang lalaki.” -- Sumpayan pa

  • Follow Us: