Banat ( Leaderboard Top ), pagematch: 1, sectionmatch: 1

Ungo ang suod niyang higala

Sila gyud ang kanunay’ng magkuyog sa higayon nga dunay pangilin nga ilang adtoon. Ang kasuod sa duruha mora’g labaw pa sa managsuon. Mao bitaw nga kun dunay kontra si Tibur si Andres man gyud ang makig-away niini.

Kausa dunay basketball league dinhi sa ilang baryo ug kay mahilig man sa maong duwa si Tibur maong gikuha siya sa usa sa team dinhi sa ilang lungsod. Ug kay maayo man sab moduwa si Tibur maong dili kalikayan nga daghan usab nga mga babaye nga matawag nga maibog kaniya.

Gawas nga may gitas-on si Tibur may pagka-ambongan usab kini siya. Samtang si Andres dili hilig sa basketball kay ang iyang ganahan mao man pagbugwal sa uma. Hinuon, sama kang Tibur may gitas-on usab kini si Andres nga susama usab sa gitas-on ni Tibur.

Angayan gyud unta nga mahimong basketball player kini si Andres sama kang Tibur apan dili usab niya mapugos ang suod niyang higala kun wala kini hilig niining maong matang sa paugnat sa kusog.

Ambongan usab kini si Andres ug may usa ka dalaga nga hilom nga naibog kaniya ug kini mao si Besing. Maanyag kini si Besing ug bigot kaayo’g sampot ug mao gani kini napiling “Rayna” dinhi sa ilang baryo niadtong miaging pangilin.

Pero, mora’y walay pagtan-aw si Andres sa dalaga kay ang iyang lingaw anaa man sa pagdaro sa iyang uma. Patay na ang iyang tatay ug nanay. Ug kadto si Manang Goria nga iyang inahan gidungogdungog nga ungo kuno kay may nakakita nga nagtuwad sa ilawom sa mansinitas.

“Ibog kaayo na si Besing nimo, Bay Andres,” ni Tibur pa. “Sus, kun ako pay naa sa imong lugar, wa na, ako na nang giuyab...”

Mipahiyom lang si Andres nga nahimuot sa gipahayag sa iyang suod nga higala.

“Ikaw lay panguyab ni Besing, Bay Tibur, suwayi lang...”

“Dili na mahimo, Bay Andres, uy,” ni Tibur pa. “Wala nako mahigugma si Besing kun dili nganha nimo...”

Wala na motingog si Andres. Unya, usa ka gabii nasugatan ni Andres nga nag-inusarang naglakaw gikan sa merkado.

“Ikaw rang usa, Sing?” ni Andres pa. “Ayaw og kompiyansa kay daghan ra bang mga adis-adis dinhi sa ato...”

Ingon sa milumpat ang diwa ni Besing sa nabati niya gikan kang Andres nga may kahingawa diay kaniya nga morang usa niining orasa karon sa kagabhion.

“Unsa man, ihatod ko nimo sa amo, Dres?”

“Oo, ihatod ta lang ka,” ni Andres pa.

Ug igo pa lang gani silang nakalakaw og pipila ka metros may miatang kanila. Lima ka buok mga bugoy nga adis-adis. Ug may mga armas sila. Gikuptan dayon nila si Besing. Ug gitabangan og suntok si Andres.

Apan unsa bang pagka-unsaa nga mora ma’g bato ang lawas ni Andres ug iya mang gipang bunso sa yuta ang mga adis-adis ug kini nakita gyud sa duha ka mga mata ni Besing ug dinhi nakadayeg ang dalaga sa ulitawo. Kay isog ug kusgan kini.

Unya usa ka gabii samtang nagkuyog sila si Tibur ug Andres nga namista sa silingang baryo giatngan sila’g mga armadong tawo. Ug nahibulong si Tibur sa iyang higala nga sama man sa kilat ang kaabtik ug kakusog niini kay gipanglabay man niini ang mga armas sa mga bagis nga nangatang nila. Naglumbag panagan ang mga bagis. Dinhi nagduda na si Tibur sa pagkatawo ni Andres.

“Bay Andres, suod man kaayo tang amigo, mora’g duna kay gitago nako, ug kini mao ang imong kaabtik ug kakusgan, ngano man ni, Bay?” ni Tibur pa.

“Bay, ato-ato lang ni, ha, ug ayaw gyud panabi ni bisan kinsa,” hinay ang tingog ni Andres. “Bay Tibur, nia na kanako ang dugo sa kaliwat...”

“Ka-kaliwat, unsa mang kaliwata, Bay Andres?”

“Kaliwat sa pagka-ungo, ako ang midawat sa gahom sa pagka-ungo nga gibilin ni Nanay Goria nako,” mitutok si Andres kang Tibur.

Dinhi ingon sa mikurog si Tibur sa kahadlok apan suod niyang higala si Andres ug misamot ang iyang kalisang dihang iyang nakita nga nausab ang bayhon niini. Naningkaang ang buhok ni Andres ug milaksot ang iyang nawong ug nanag-as ang iyang tango ug mga kuko.

“Ngrrrrrrkkk....ayaww lang og kahadlok, Bay Tiburrr kay dili ko mangunay og suod nga amigo, he, he, he, sige, dinhi ka lang kay mangabat pa koooo, wakkkk! wakkkkk!!” Ug milupad si Andres.

Mora’g kandila nga giugbok si Tibur sa iyang gibarogan nga wala makalihok nga nagtan-aw sa iyang suod nga higala nga misulpot lang paingon sa itaas. (Kataposan)

  • Follow Us: