Hinog sa punoan

Gula 65

“Pahuway una,” ni Patrick pa dihang nahuman na siya’g kaon. “Aron mamaayo ka’g dali.”

Human mahipos ni Patrick ang iyang kinan-an, migawas na kini sa lawak nga iyang nahimutangan.

Pagkaugma, lagsik na ang lawas ni Urielle. Sayo siyang mibangon aron maghikay sa ilang pamahaw. Apan pag-adto niya sa kosina, iyang naabtan si Patrick nga may gikurikuri. Naglung-ag na diay kini. Naghikay sa ilang pamahaw.

“Ako na lay tiwas niana,” matud ni Urielle nga mibati’g kaikog kang Patrick.

“Uy,” ni Patrick nga nakugang ug mikalit paglingi kaniya. “Nagmata ka na diay?”

“Ako na lay motiwas nianang imong gibuhat,” ni Urielle pa. “Lagsik na man ko. Maayo na ko.”

“Ako na lang,” ni Patrick pa. “Tingalig mabughat ka pa unya hinuon.”

“Bughat gud. Maayo man kun grabe ang akong sakit. Over fatigue ra tingali to, uy.”

“Bisan na. Mas maayo gyud nga maneguro ta.”

Wala na lang mamugos si Urielle. Iyang nasuta nga dili gayod mosugot si Patrick nga siya’y mobanos ug motiwas sa paghikay sa ilang pamahaw.

Nahinulong na lang hinuon siyang naghinud-ong sa gibuhat ni Patrick. Nalingaw siyang nagtan-aw nga abtik kaayo’g mga kamot nga mikurikuri sa mga bulohaton sa kusina. Kadali ra kining nahuman. -- Sumpayan pa