Banat ( Leaderboard Top ), pagematch: 1, sectionmatch: 1

Ang relo de pulso ni Felis

"Unsay oras na Felis?" pangutana ni Ponso nga iyang gikasugat sa dalan nga may dalang pukot paingon sa dagat.

Dayong hangad ni Felis sa adlaw ug mitubag, "Alas dyes na ron sa buntag." Gikarkulo-karkulo lang god niya ang dagan ug ang pagkabutang sa adlaw diha sa langit kay unsaon man nga patay kun dili na ba moandar iyang relo kay nabunal man kini dihang usa ka gabii niana natapigas ang iyang tiil sa pagtikang niya sa gubaon nilang hagdan ug dayong kahagbong niya paingon sa ubos sa ilang silong.

Usa na ka bulan ang milabay sukad niadtong hitaboa ug wala siya makapaayo niini kay layo man god ang lungsod ug apiki sab siya sa kuwarta.

Yano lang ang kahimtang nila ni Felis. Mag-uuma si Tatay Ponso niya ug si Nanay Bising sab niya tigbaligya lang og tabako ug tilad diha sa ilang balay.

Kining reloha nga gisul-ob sul-ob ni Felis hinatag kaniya sa iyang apohan nga si Lolo Sabas dihang hapit na kini motaliwan ngadto sa laing kalibotan gumikan sa kaguol unya nasakit sa kasingkasing kay wala makadawat sa 'backpay' isip girilya panahon sa Hapon dinhi sa atong nasud.

Bisan og ayohonon kon repironon ang relo, gisul-ob sul-ob lang gihapon kini ni Felis kay nagatuo man siya nga posturawo gyod kaayo ang tawo kun may orasan samtang maglakaw sa dalan sama ni Mr. Reyes nga usa ka maestro nga silingan nila sa ilang baryo.

Usa ka buntag niana nga gibukotan sa mabagang dag-om ang kalangitan, gikasugat niya si Flor nga usa ka maestra padulong sa eskuylahan sa ilang baryo.

"Felis, unsa na may oras ron mora’g late na siguro ko sa akong klase da"? Nangutana si Flor.

Sama sa naandan, mihangad ug mitutok siya sa adlaw apan gibukotan lagi sa naglugitom nga dag-om mao nga dugay siyang nakatubag ni Flor niini.

Sa paglingi pa niya, layo na si Flor nga dagko kaayo ang mga lakang paingon sa eskuylahan nga gitudloan.

Nakapanglingo-lingo si Felis kay dugay man siya nakatubag ngadto sa pangutana sa usa ka binuhat nga sa hilom dugay na niyang gipangga ug gimahal! (Kataposan)

  • Follow Us: