Banat ( Leaderboard Top ), pagematch: 1, sectionmatch: 1

Dili akoa ang paghukom

Nagpatulo ko sa akong mga luha sa mga sakit nga sinultihan sa akong bana nga si Melchor. Hapit di ko na maagwanta ang pag-antos sa among panagpuyo.

"Nagbasol ko nga ikaw ang akong gipakaslan, Yeena! Buysit ka sa akong kinabuhi!"

Napupos na gyud ang akong pailob. Misilaob ko sa kasuko samtang namahid sa akong mga mata.

"Ikaw ang buysit, Melchor. Giwaldas mo ang nasunod mong katigayonan sa babaye, sa sugal sa barkada ug sa inom! Kun nagbasol ka nga gipangasawa mo ako labaw na kong nagbasol nga ikaw ang akong nabana!"

"Hilom!"

Nagtagawtaw si Melchor nga mikanaog sa karaan namong balay nga nasunod sa akong bana sa namatay niyang mga ginikanan. Nakadanguyngoy ko nga migakos sa walo ka tuig namong anak nga naghilak usab. Nagdako siya nga nasinati niya ang kanunay namong panag-away ni Melchor.

Gabii na apan wa gihapon mopauli si Melchor. Natulog na ang among anak sa lawak. Nanambo ko sa bentana. Didto mapunta ang akong panan-aw sa atbang nga balay. Nadungog ko ang katawa ni Andro ug Melanie ug ang agik-ik sa anak nilang babaye.

Naitlib ko ang ubos kong wait. Usa ka kagahapon ang miuliot sa akong handurawan.

"Di ka makahatag sa akong pangandoy, Andro. Unsaon ang gugma kun mag-antos ko uban kanimo." Giprangkahan ko si Andro dihang gidaygan niya ako sa iyang gugma. Mituyo gyud siya sa pagpamisita kanako. Di managlagyo ang among gipuy-an sa among lungsod sa San Isidro.

"Pobre lang tuod ang akong mga ginikanan, Yeen, pero may ambisyon sab ko nga molampos sa kolehiyo."

"Gikasubo ko, Andro, nga di ko madawat ang imong gugma."

Nasayod ko nga gimahal ko pag-ayo ni Andro. Apan haruhay nga pagpuyo uban sa akong bana ang akong tinguha. Managsama kami si Andro, mga anak og kabos. Gitak-an na ko’g puyo sa kinabuhing kabos. Maong gisugot ko si Melchor nga nangulitawo usab kanako.

Anak si Melchor sa usa sa giilang adunahan sa San Isidro, ug bugtong pa gyud. Bisan may pagka bugoy siya ug wala’y hilig sa pagtungha sa kolehiyo kay nagsalig sa kaadunahan sa iyang mga ginikanan, nakigminyo gyod ko kaniya.

Malipayon ako uban kang Melchor. Nangipon kami sa pagpuyo sa balay sa iyang mga ginikanan. Apan inanay nga nausab si Melchor. Nahibalik siya sa kinaiya niya sa ulitawo pa dihang nagsunod sa pagkamatay ang iyang mga ginikanan sa sakit nga kanser.

Dinhi magsugod ang akong pag-antos. Kanunay magyampungad sa sugalan si Melchor. Kanunay makig-inom sa beerhouse sa among dapit uban sa mga barkada. Ug dili kay kini lang, namabaye usab siya, ug dapatan na ko niya kun mag-away kami.

Hangtod nga tagsatagsa nga nahanaw ang among kaadunahan tungod sa mga bisyo ni Melchor.

Nakadanguyngoy ko nga nahinumdom sa akong kagahapon. Pagkabulahan ni Melanie nga nakabana kang Andro. Usa na ka malampusong tawo si Andro. Nakahuman siya sa kolehiyo pinaagi sa pag-working student. Maayo na siya’g posisyon ug suweldo sa gitrabahoang kompaniya sa siyudad. Matag gabii siyang mopauli sa among lungsod. Buotan ug responsable nga pagka bana ug pagka amahan si Andro.

Giumod ko ang akong nawong sa akong mga palad. Nauyog ang duha ko ka mga abaga sa akong pagbakho. (Kataposan)

  • Follow Us: