Banat ( Leaderboard Top ), pagematch: 1, sectionmatch: 1

Dugos ni Eva

Miduol dayon mi si Rodney kang SPO4 Cruz ug nagpaila sa among kaugalingon. Gipasabot namo si SPO4 Cruz nga wala koy sala kang Mr. Prax Vidoya. Hinuon, si Mr. Vidoya  ang sad-an nako kay buot ko niyang lugoson. Gipasabot ko ang polis nga naglagot si Mr. Vidoya kanako kay wala man siya molampos pagbuong sa akong kadungganan ug nasamdan pa siya dihang ako siyang gisuklan.

Miawhag si SPO4 Cruz nako pagkuyog ngadto sa ilang buhatan aron kakuhaan kog dugang pamahayag. Gusto sab niyang kuhaan og pamahayag si Rodney. Misugot ming duha sa awhag sa polis nga maoy nangulo sa pagdakop kang Mr. Prax Vidoya ug sa iyang mga sakop. Andam mi si Rodney pagtubag sa mga pangutana sa kapolisan.

Namiya dayon mi sa taliwala sa lasang. Gidala sa mga polis ang mga dinakpan ngadto sa gawas sa lasang diin gibilin nila ang ilang mga sakyanan. Nagsunod mi si Rodney sa igong gilay-on. Hait og tinan-awan si Mr. Vidoya kanako dihang nagkatagbo ang among mga mata. Apan wala na siyay mahimo kay usa na siya ka dinakpan. Natapos na ang iyang pagtakoban kay nabisto na ang daotan niyang binuhatan.

Samtang naglakaw paingon sa gawas sa lasang, nakigsulti si SPO4 Cruz kanamo ni Rodney. Gisuginlan mi niya nga dugay na nilang gipanid-an si Mr. Vidoya kay may nakasulti kanila mahitungod sa sekretong binuhatan niini. Ug dihang misuka sa matuod ang upat nila ka dinakpan (ang nag-gang rape nako), gipaningkamotan gayod nilang madakpan kini. Apan naglisod sila pag-serve sa warrant of arrest niini mao ila lang gayod kining gisundan sa hilom aron pagpangitag tukmang panahon. Ug karon nataymingan na gayod nila si Mr. Vidoya dinhi sa taliwala sa lasang.

Paggawas namo sa lasang, natukmaan namo ang upat ka sakyanan sa kapolisan nga nag-urong sa daplin sa dalan. Gipasakay dayon sa mga polis ang mga dinakpan. Didto mi mosakay sa sakyanan nga giluwanan ni SPO4 Cruz. Dihang nakapahimutang na ang tanan, nagsunod pag-aginod ang upat ka sakyanan balik sa dakbayan sa Sugbu. (Sumpayan pa)

  • Follow Us: