Road rage sa Pasko
Miagunto ang ligid sa SUV dihang kalit giyatakyatakan ni Revo ang brake. Misanting ang mga dalunggan dungan ang pagsaka sa iyang kilay samtang nagtutok sa nagbisikletang lalaking daot kuyog sa batang babaye nga kalit lang mi-cross.
Maayo gani kay nakabantay si Revo. Sa iyang kalagot, gibosinahan ang badlungon aron makaamgo. Apan gisigahan man hinuon si Revo sa mga mata. Giisahan pa gyod siya’g kinumo. Haskang hayblarang Revo. Naduot og dugay ang bosina nga maoy iyang napahimungtan.
Mipula ang suga sa trapiko. Napugos siya paghunong. Nakita ni Revo didto daplin sa dalan nga gidali-dali’g pakanaog ang bata nga kauban sa sapsing og lawas. Ug nagdali kining mitindak sa pedal paingon sa iyang nahimutangan. Dihang naa na sa iyang kilid ang karaho, kalit nga may gihiram si Revo diha sa iyang kilid – usa ka 45 ka libreng pistola. Ibton na unta niya kini aron ipunting sa mahagithagitong linalang. Apan ingon sa may mihunghong kaniya. “Ayaw, Revo! Ayaw ipadayon ang imong nahunahunaan. Timan-i nga taas ka’g puwesto sa katilingban batok ning karaho nga usa ka sentimo lamang.”
Daw giyab-a’g bugnaw’ng tubig ang nagdilaab nga kasuko. Inanay’ng mius-os ang nagbukal nga dugo, gibuhian ang pistola ug sa ahat-pahiyom, mikaway si Revo sa tawo. Nagsinyas nga kalimtan na lang ang panagbangi sa dalan kay Pasko na ra ba. Apan nagpabiling masuk-anon ang tonto ug kusog gihapak ang sakyanan ni Revo. Naigking si Revo. Ang kalayo sa kasuko nga miawop na unta, midilaab na pod. Maayo gani kay miberde ang traffic light ug napugos siya pag-abante.
Pag-abot niya sa CPPO, misaludo niya ang tanang military nga iyang nalabyan. Unya sa naka-parking na, milahos siya sa firing range area ug sa nag-aso-aso nga kapungot, gihurot ang tanang bala sa iyang 45 kalibre punting niadtong tawong karton nga miyangoyango human matusaktusak ang ulo sa nanglapos nga kabangis.
“Para unta kining mga balaha niadtong tawo nga nakig-road rage nako ning Paskoha. At least, nahuwasan ko sa paaging wala mamansahi ang kalinis sa akong pagka heneral.” Tuaw ni Revo sa iyang kaugalingon. (Kataposan)
- Latest
