Banat ( Leaderboard Top ), pagematch: 1, sectionmatch: 1

Tim-os ug tiunay pa ang akong gugma

Gibuwagan ni Matilda si Efren kay lagi duna na may laing lalaki ang nangulitawo kaniya nga anak og dato, ug kini mao si JunRey. 

“Tungod ba kang JunRey, Matilda, nga wad-on na ko nimo sa imong kasingkasing, mao ba, ha,” nagkanayon ang ulitawo.

 “Oo, tungod kang JunRey, karon pa nako matugkad nga wala diay koy gugma nimo, Efren. Kuan lang tong ako, mora’g game lang og mahimo ba, nga sukad ron,dili na ko gusto nga magduolduol ka nako...” mitaas ang tingog sa dalaga. Mao kadto ang katapusan nilang panagkita ni Efren ug Matilda, ug tungod niini gitingob na lang ni Efren ang iyang panahon sa pagtuon. Ug kay working student siya naningkamot siya nga makahuman sa iyang kursong gikuha. Tuod, paglabay sa daghang katuigan usa na ka malampusong magpapatigayon si Efren ug miasenso ang iyang estado sa kinabuhi kay nadato man siya. Unya usa ka hapon samtang nalingaw siya’g kaligo sa usa ka beach resort, may babaye siyang nakita nga nag-inusarang naglingkod sa usa ka gidahik nga pambot, ug sa dihang iyang gipadul-an iyang nailhan nga kini mao si Matilda. Iyang giduol. Gisangpit og hinay. “Matilda, ikaw ba kini ...  kumosta ... kumosta ka na?”

“Uy, ikaw man diay, Efren, nia lingawlingaw na lang, suroysuroy dinhi sa beach resort aron malimot sa nahitabo nako,” ni Matilda nga kahilakon.  Pero, dugay nang nasayud si Efren nga si Matilda gibuwagan ni JunRey, ug duna gani sila’y usa ka buok anak ug hain kini karon, wala mahibawo si Efren. Apan anaa pa gihapon sa kasingkasing ni Efren ang gugma niya kang Matilda. Busa, “Matilda, ang akong gugma nimo, sama niining dagat, sama sa iyang puting bunbon nga timgas ug tiunay sa iyang kaputi,” ug mitupad si Efren paglingkod sa babaye nga mibuwag kaniya kaniadto, ug dihay pinisik sa napusgay nga mga balod. (Kataposan)

  • Follow Us: