Palihog, hikalimti na lang ako

Nagdali si Miraluna paingon sa bungtod nga ilang abotanan ni David matag Sabado, sa dapit diin niya ihatag ang iyang gugma sa lalaki nga usa ka ilong tuwapos. Si David mao ang tighakot nila’g tubig kon maguba ang makina sa ilang pressure tank.  Usa ka hapon, miduol kaniya si David ug mipadayag sa gibati niini. Nakurat gani siya niadto kay gikuptan man ni David ang iyang kamot.

“Miraluna, ayaw lang og kasuko, ha, duna koy isulti nimo,” ni David pa nga mora’g may kataha.

“Unsa na, ha, David?” pakisayod sa dalaga.

“A, kining adto na lang tingali sa bungtod. Di ba moadto ka man sa bungtod kay maglamaw mo sa imong mga higala ... adto na lang nako isulti. Total, ako may mosaka sa botong...” hinay ang tingog ni David. Tuod, sa didto na sila sa bungtod, ug diha na ang mga botong nga andam na sa ilang pagpanglamaw, gisulti dayon ni David ang buot niyang isulti segun sa iyang gisaad. Niya pa, “Miraluna, gihigugma ko ikaw...”

“Ha, ako imong gihigugma, hala, uy,” ug mipahiyom si Miraluna. “Oo, mahal ko ikaw. Pobre ko, ilong tuwapos apan dili ang akong gugma,” padayon si David. Ug mao kadto nga kanunay na lang motungas si Miraluna sa bungtod kay nahimo na man niyang hinigugma ni David. Dako kining ilang kalubihan nga misangkap paingon sa bungtod diin didto ang payag nilang David. Si David na lang ang nagpuyo sa payag.

Karon nagdali si Miraluna nga mitungas sa bungtod ug milahos siya sa payag sa  ulitawo. Wala didto si David. Mingaw ang payag. Dinhi gibati og kamingaw si Miraluna sa hinigugma niyang ulitawong kabos. Hain kaha si David? Sabado karon ug mao ang adlaw nga mag-abot sila dinhi sa bungtod. Unya, nakadungog siya’g kutingkuting sa gitara apan dili si David kundi si Anton, ang anak sa ilang saop. May gidunol nga sulat ug dayon iyang gibasa.

Miraluna, mahal ko ikaw, apan natugkad ko nga way kapaingnan ang maong gugma ... busa hikalimti na lang ako. (Katapusan)