EDITORYAL - Ceasefire nga wala tahura

Makigsabot na usab pagbalik si Presidente Duterte ngadto sa mga rebeldeng komunista alang sa pagkab-ot og kalinaw human sa usa ka bulan nga panag-engkwentro sa puwersa sa gobiyerno ug sa armadong pundok sa New People’s Army.

Ang Communist Party of the Philippines-National Democratic Front- (CPP-NDF) mianunsyo nga modeklarar sila pag-usab og unilateral ceasefire alang sa pagpadayon sa peacetalks. Sayo pa kaayo aron ang katawhan malipay niining lakang sa NPA. Mas maayong ang mga rebelde moseryuso sa ilang tinguha pinaagi sa buhat, ug dili kay kutob lang sa mga pulong.

Si Duterte wala dayon modason sa unilateral ceasefire sa NPA kay gusto niyang konsultahon usa ang militar ug ang kapolisan. Kapin usa ka buwan na ang nakalabay dihang gibakwi sa NPA ang ilang unilateral ceasefire sa hilom nga paagi, apan aduna na sila’y gipatay nga mga sundalo niana dayong adlawa didto sa Mindanao.

Ang nakasakit sa buot ni Duterte  kay usa sa mga napatay nga sundalo, gipusil og 74 ka higayon nga iyang giisip nga dili binuhatan sa usa ka bayani nga may idolohiya ug dungog, kun dili, binuhatan sa usa ka brutal nga kriminal. Tungod niadto, gibakwi ni Duterte ang unilateral ceasefire sa gobiyerno ug nibalik ang opensiba. Gusto karon ni Duterte nga isuwat gyud sa papel kining bag-o nga unilateral ceasefire, apan ang pangutana kun tahuron ba kini sa duha ka habig? Sa labing ulahi nga paglapas sa ceasefire, ang NPA maoy unang nipabuto og armas. Ang ilang pasangil mao ang padayon nga civil military operations niini sa mga hilit nga lugar.

Unsa man diay ilang gusto, dili na motrabaho ang AFP pagbantay sa mga civilian government agencies nga nagdala og serbisyo sa mga hilit nga komunidad? Kun ipamugos gihapon sa NPA ang ilang pagpangangkon og “teritoryo” mas maayo pa nga wa na la’y ceasefire, kay dili man kini mahimong ilhon sa gobiyerno. Si Duterte miingon nga usa ra ang teritoryo sa nasud ug kini sakop sa gobiyerno sa republika, ug dili sa NPA.